〈不要說人地外國，試著說我地香港〉
人在異鄉，地球人最大體會就係——外國月亮並唔是特別圓架！連講三個post，環保野無錯可能外國先進過我地，而且因為某d政府、政策配合，容易實行過我地。好似墨爾本超完善單車道路網咁，仲有家居太陽能電板、家居雨水儲存系統等，但長他人志氣滅自己威風嘅野我地球人係唔會做架，香港環境（政治又好環保又好）已經咁差，再妄自菲薄踩多腳真係無乜謂。況且我真心覺得，好多有心人為香港環境做緊一d了不起嘅事。所以，決定出呢一個大曬冷post，介紹一d值得關注嘅綠色群組、專頁、環保L……乜都好啦，總之等大家唔好再成日「人地外國」，試下多d講「我地香港」！
講多無謂，here we go：
專頁／個人篇：
1. 不是垃圾站 Waste-no-mall
呢檔野勁呀，根本就係民間資源回收中心，咩回收、換物、workshop乜都有齊。千其唔好諗住背後有咩人搞有咩機構，全部都係元朗有心人，個個禮拜落去幫手。亦唔好大安旨意諗住扔一大袋屋企垃圾俾佢地就算，唔該自己落手分類，唔明就問，明左之後仲可以留底幫手教其他人點做。唔係元朗人都不妨入元朗探下佢地考察下，睇下自己社區有冇機會搞到一檔。民間自發有冇用？唔知架，但相信人多好辦事，真係十八區都有「不是垃圾站」，我又唔信議員或者政府可以扮睇唔到，況且提升垃圾價值，話唔埋有人投資呢方面發展，咁曼美好緊係推動到政府或相關部門，將垃圾站變成資源回收中心啦……有冇可能？唔知架，但你唔參與就一定無囉。
時間：星期六下午4時至6時
地址：元朗鳳攸北街休憩處旁空
2. 迷失的寶藏: 發泡膠回收行動 Missing Link- Polyfoam Recycling Scheme
打破發泡膠無得回收謎思，重新搵返發泡膠嘅回收價值！你除左可以拎用完清潔過嘅發泡膠俾佢地，仲可以上去參觀甚至幫手做義工，去街市收發泡膠，返工場幫手清潔……去體驗一次，睇下香港人用膠有幾得人驚，保證你生活上唔想再用咁多發泡膠！
地址：荃灣沙咀道57號荃運工業中心二期J座21樓J室
電話：3568 3714
3. 野人
「人地外國」成日有咩zero waste達人將垃圾放入玻璃樽嘅，其實我地香港一早有架啦，而且簡樸到唔需要用玻璃樽黎證明自己！呢位野人一家三口住係田邊、著舊衫、自己帶包裝出街……今年甚至想嘗試唔用電，研究用地底瓦罐保存食物。除左自己生活簡樸，仲會開班教學，將環保訊息宣揚開去。舊年仲開左個「自然111」專頁，推廣「一人一日少一件」嘅減廢生活態度。
4. GreenPrice 綠惜超級市場
又黎成日話「人地外國」有賣到期、過期或醜食超市、無包裝小店乜乜物，嗱，而家香港就有一間專賣過左Best Before 日期嘅超市，價錢仲平好多。原來香港每年有成價值1.2億元過左「此日期前最佳」（Best Before Date）嘅食物，扔左去堆填區，但其實好多食物，如例杯麵、零食，即使過左最佳食用日期三個月，都未必會變壞，可以食用架！口口聲愛地球、環保之友、唔想浪費嘅你，又夠唔夠膽幫襯先？
地址：觀塘駱駝漆三期五樓N室
營業時間：星期六日上午11時至下午7時
5. 堂食：『棄』之可惜！
一個關注同監察香港堂食但用即棄餐具嘅專頁，雖然未有好多follower，暫時亦都只係呼籲大家影低連鎖快餐店堂食即棄相片俾佢地，但仍然值得更多人支持。因為行動背後目的，係希望利用群眾聲音，俾壓力店家去正視問題，愈多人參與迴響愈大，成功機會先會愈大。大家出街食飯發現堂食即棄，除左大叫唔好之外，記得影張相俾佢地啊！
6. 龐一鳴
呢個人好出名，已經唔需要點介紹，但都要特別講嘅原因係，佢同牧師陳家良等人，一齊做左一樣地球人覺得非常非常咁了不起嘅事——就係開左一個教人係香港單車代步嘅課程！成日講「人地外國」單車政策點好道路點好，所以先bicycle friendy，香港mogalamogala。講真，係未就咁認命先？定係我地可以明知不可為而為知？課程有理論介紹香港道路同單車政策，亦唔少得最重要嘅路騎實踐。馬路踩車唔係淨係單車友專利，人人都得！將單車代步，係一般人嘅生活中實踐出黎。
課程詳情：https://www.facebook.com/events/1943857319179682/
7. 垃圾手作 - Garbage Handmade - HK
成日見人Share埋咩tasty、咩Nify DIY短片，相比之下，呢一個垃圾手作，同地球人專頁一樣——low-tech得多TAT！不過唔緊要架，我地勝在有心肯做！水樽變燈罩、膠紙座、儲物架……有手藝有創意有內容，唔使下下打燈拍片嘅~~~
8. 走杯 GO CUP
簡而言之，呼籲大家外賣「走杯」，自備私家杯。仲同幾間餐廳一齊將四月逢星期五定為「無紙杯」，實行做起個勢！
9. 旅痕社
點解介紹呢個網？話說地球人都係一個Backpacker，而家仲去埋澳洲Working holiday！之不過我忘記左帶睡袋黎TAT，雖然遠水救不了近火，但我一樣諗起呢個網，鼓勵大家Share旅行用品，大背包、營帳等，唔洗下下買新，買完只係用幾次，浪費又唔抵，不如拎出黎，實行資源共享。
網址：http://sharewego.wixsite.com/website
10. JupYeah 執嘢
講真有邊個女人唔貪靚唔鍾意扮靚？但係未一定要買衫買到過曬火，成個衣櫃爆衫？定係其實可以同人分享靚衫，以衫換衫？呢個專頁係由幾個愛扮靚嘅靚女搞嘅，自己身體力行著二手衫不在話，佢地除左有網上換物，仲會搞大型換物會，地球人就親身去過，d衫質素又高又新淨，絕對係尋寶好地方。
11. We-use 餐具租用
成日話人地堂食即棄點衰點衰，其實自己開Party、搞公司活動未又係貪方面用即棄！嗱，米話地球人唔醒過你，呢個餐具租用服務，真係超方便，餐具有唔同款式解唔在講，仲有專人送貨收貨，仲搵社區婦女幫手洗餐具，環保得黎又促進社區經濟，係未好正先！
網址：https://weusehk.com/
12. 綠活地圖wherevergreen.hk
除左以上介紹嘅組織、專頁，香港其實仲有唔少有人為環保出力，例如好多值得支持嘅環保小店，如果大家想知道邊度有環保野賣、邊度有綠色活動，推介你上綠活地圖個網。如果你有綠色資訊想分享，仲可以登記成為mapper，幫手豐富個地圖，係未好正先？
網址：http://www.wherevergreen.hk/
其實香港仲有好多好多好多有心小店、品牌甚至群組，做緊大量環保工作，一次過都講唔曬，佢地需要大家嘅關注同支持，俾個Like and Share唔代表乜，但起碼資訊有機會去到多一個人身上。今次介紹住咁多先，下次有機會再同大家分享實用群組、有心小店啦！
—————延伸閱讀分隔線—————————————
（行山版）有心專頁推介：
https://www.facebook.com/…/a.229275054102…/369605273402796/…
地球人另一分身，自己專頁自己推，人在異鄉寫香港：
https://www.facebook.com/homeiswhereyourmindis/
greenprice荃灣 在 GreenPrice 的推薦與評價
... 荃灣梨木樹邨2座11號舖 惜食堂X 太古地產日期: 18/9/2023 – 13/10/2023 地點：惜食堂指定月餅收集點地址：詳情請見@foodangel_hk_official （以上日期只供參考，詳情以 ... ... <看更多>