《香港·樂壇未死》
睇完《Chill Club》，想分享下感受。友台既綜藝節目唔吸引，我大可以咩都唔睇。今時今日呢個年代，線上線下，觀眾可以選擇既節目多的是。選擇睇《Chill Club》，其實係真心想爭取更多既機會去感受一下當今香港既樂壇。
近年，香港既樂壇俾我既感覺係：四分五裂、青黃不接。自大台同各大唱片公司鬧翻左之後，加上大台獨大，樂迷確實好難再响主流既平台、大氣既電波中聽到不同既歌手、多元化既歌曲。《勁歌》被淪為週末凌晨既節目，足見大台對音樂既不重視。就算你有得聽，亦不外星夢响度圍威喂。頒獎典禮被淪為星夢既annual dinner，係對香港樂壇既一種侮辱。另一邊廂，昔日最受歡迎既男女歌手，個個都只係專注响內地發展。美其名係搵真銀，實際上，係佢地根本唔志在呢一個捧紅佢地既地方，情願穿州過省做馬騮戲，都唔肯／識返黎。
响重塑香港既樂壇方面，Viu的確係不遺餘力。由《造星》所孕育出黎既男團，無可否認，再次掀起左香港人久違了既追星熱。能夠打破壁壘，容納不同公司、不同路線既歌手同台獻技，真正本住「音樂第一」既宗旨黎搞既頒獎騷，又點會無叫座力？今晚，我睇到既並唔只係一個流水作業式既頒獎典禮：頒獎、致詞、唱歌、再頒獎、再致詞⋯⋯佢地玩好多新野：先後加插左幾個組合，以及幾個唱得之人一齊黎jam歌既環節，令成晚好似一個騷咁。當中令我感受至深既，係呢個《樂壇未死》既大合唱，同某幾位歌手得獎之後既感言。
樂壇未死，並唔只係一首歌，而係在座每一個歌手同音樂人，同每一個响電視機前面既觀眾所相信，並且共同奮鬥以達至既信念！就係因為香港有一班睇死後生既老屎忽，同一班見錢開眼既所謂歌神，令我地更需要珍惜同重視呢一班肯留守响香港，為土生土長既香港人唱廣東歌既歌手！「香港加油」、「香港歌手會再次成為亞洲第一」依兩句話，依家聽起黎好似有啲不設實際，但係人生，正正係需要用夢想黎滋養。無人可以話我地唔得，除非連我地自己都要睇死自己！多謝《Chill Club》，多謝Viu，給我們重塑香港樂壇既一夜！
🙏🏽
#ChillClub推介榜年度推介 #人人樂壇音樂第一 #音樂第一
