《解決師》有製作，無創作，唔似韓劇《The K2》令人停不了。
因為有港鐵十點停駛助攻，早了回家，斷斷續續地看了多集《解決師》，無可否認是套有較充裕製作費的劇集，有些鏡頭拍得幾好，但故事實在無厘驚喜，很多評論直言老土，大橋似足劉監製舊作《點解阿sir係阿sir》，但有時橋唔怕舊，最緊要受，做小小改變，感情為夠感動，動作設計精彩，演員出色，甚至有個超賤奸角，都可以吸引人追，這劇其實有齊這些原素，但暫時感覺效果是到喉唔到肺，唔算好吸引人去追！
王浩信和唐詩詠在《不懂撒嬌的女人》中，是對好襯的CP，去到這劇反而無乜火花，視后的角色在首周又要隱藏身份，成日無厘表情，第一集就死的張曦雯搶戲過佢好多。在愛情線、學校線、警察線和黑社會線中，橋段最老土首推黑社會線，爭做龍頭條橋好舊，見到太子個樣都知暪住老豆，最想做龍頭係佢。卧底攞隻介指出來話完成任務結婚，即係預告佢會死，又係第二條老土橋。學生反而有啲位ok，最大問題反而係啲樣唔多似中學生，似大學生多啲，其實ViuTV 《教束》好多學生都超齡，但他們的違和感無咁強。動作設計也是一般，男一無功夫底，打得唔靚影響了觀感。苗可秀其實好好演技，但劇中角色無位發揮。張穎康這差佬過於繃緊，反而不及《十二傳說》的「小豆」好看。
整體上這劇就是欠了彰力令人很想追下去，看時立即聯想到2016年底的韓劇《The K2》，因為怕了之前韓劇的絕症和灑狗血，有段時間無睇韓劇，朋友推薦下去看，連誰是池昌旭和允兒也不知，頭一集見佢不斷講允兒童年母親被殺，被送到西班牙修道院監視居住，有哋想棄，但池昌旭這落難僱傭兵的身手，加上另一演員宋允兒，飾演為了成為第一夫人，不擇手段的女人，演技十分精彩，便被吸引一直看下去，池的身手一流，落難和因保護允兒產生愛意，有點似王唐在《解決師》中的關係，允兒追查母親死因這線，宋允兒能否成為第一夫人，都編排得十分有彰力令觀眾去追，而《解決師》也算是相同類型的劇集，所欠的正是這份緊湊感和彰力，睇少了一集也懶得去追番，反正都大概知說甚麼。
