2017-10-06 Metro Daily Hong Kong《都市日報》
享受音樂 無懼上落
#蘇永康 甘心做期權
蘇永康過往予人的形象是愛玩、喜歡夜蒲的大男孩，但原來經歷第二段婚姻的他，早已修心養性，悟出如何成為一個大男人的道理，明言「八九十後的小朋友有好大進步空間」的他，更有一套培育小孩的哲學，甚至希望兒子將來可以「當兵」。Prof J形容「堅離地」的蘇永康就如股票期權，每逢觸及人生低位，看似快要跌穿「行使價」的時候，都會出現一首金曲，以槓桿效應將他的事業再度推上高峰，亦為他的支持者帶來驚喜。
Y=朱明銳
PJ=徐燦傑
S=蘇永康
Y：今日好開心，我同Prof J見到老友，恭喜先！
PJ：恭喜佢咩嘢先？
Y：新晉爸爸！
PJ：同埋出咗隻新碟！
S：多謝多謝！
Y：蘇永康都唔使多介紹啦，我哋等咗呢個訪問好耐喇！
S：我都等咗你哋嚟訪問我好耐啦！
Y：蘇永康以前係一個大男孩，鍾意玩、鍾意着靚衫，但有小朋友之後，真係時刻關心個小朋友……
S：大家知道，我經歷過第二段婚姻，會更加珍惜人與人之間嘅關係，而當有咗小朋友之後，更加感覺到人嘅責任重咗，但當然，用責任二字，負擔係沉重咗，正如李宗盛嘅《最近比較煩》，佢話家庭係一種最快樂嘅負擔，而家可以講，係我人生中最開心嘅階段。
PJ：我之前一直都有留意蘇永康嘅演出，最新呢隻碟，都好俾到真男人、家庭男嘅感覺，之前阿公(蘇永康)形象好似花弗啲。
S：以前係，但而家飲酒個Quota無咗，唔係醉嘅問題，而係第日會聲沙。
PJ：而家既然家庭為先，有無好好培訓小朋友第時接你衣砵先？
S：好多人話，小朋友兩三歲會知道佢開邊瓣，即係有咩天賦，暫時嚟睇，佢對音樂係唔抗拒嘅。視乎聽咩歌，聽陳百強，佢ok；聽草猛，佢又ok；聽我嘅歌呢，就開始眠㗎喇……
PJ：哈哈哈，呢個聽你提過。
S：聽Light jazz，又好似無乜大反應，總之就唔抗拒，但又咁講，我覺得永遠唔好將自己喜歡嘅套入去小朋友度。我自己媽咪好好嘅，到而家都仲係成日問要唔要參茶呀咁？反而我自己就好想個小朋友早啲出去飛，我覺得小朋友確係要有對翅膀去飛，其實我好想佢當兵，哈哈哈！因為而家啲八九十後，好似有好多改進空間咁……
PJ：點止改進空間，直頭係有排執啦！你隻新碟《Love From the Last Century》入面都係一啲舊歌嚟，好似《心債》、《對你愛不完》，都係翻唱別人的歌；而家好興重新灌錄以前嘅大碟，你未來會唔會考慮，例如經歷咗人生心態上嘅轉變之後，重新演繹一啲你之前嘅作品？
S：我又唔係太大興趣去翻唱自己啲歌，但係如果你翻查歷史，你會發覺我有鋪唱人哋歌曲嘅癮。Mark Lui(雷頌德)大家知道佢咩都試過晒，係第一次製作Hi-Fi碟，Wyman(黃偉文)好好，連Slogan都同我哋諗埋，叫「上世紀的情歌」。
PJ：阿公其實都係一位好識市場學嘅人嚟㗎喎，有無諗過做生意呢？
S：好多人都叫我去做Fashion，但內人正正就係做時裝嘅，咁我哋好清楚，時裝最重要唔係眼光，係計數，同埋力不到不為財嘛。至於市場學嘅計算係要嘅，例如去美國登台，西岸較喜歡國語歌、東岸仲係睇緊《壹號皇庭》，咁歌曲編配又要就返。
Y：Prof J你仲未用一隻股票來形容阿公喎……
S：我係仙股啩？
PJ：唔係！一定唔係！我覺得阿公似期權，低位啷住，好似阿公唔同年代都有金曲咁，例如《那誰》、《越問越傷心》，搵到自己位置。
S：呢個真係我成日希望做到嘅嘢來，我好喜歡「笑傲江湖」四個字。
貼地經濟小測驗
蘇永康係火星人？
每一次《娛樂 ‧ 經濟學》，我哋都會問受訪者幾個與理財及經濟有關的問題，看看藝人們的「離地指數」有多高。蘇永康在五條題目當中僅答中一條半，是因為題目太深，還是他已離地至火星？
Y：香港政府提供幾多年免費教育呢？
S：係咪9年？(答案：12年)
Y：自訂車牌最少要畀幾多錢？
S：三千蚊起跳啦！(答案：五千元)
Y：好！音樂題，再唔識就抵打啦！C.A.S.H.代表咩機構？
S：我淨係知幫我哋收錢……香港作曲作詞人協會！
(一半正確，準確答案為「香港作曲家及作詞家協會」)
PJ：你有小朋友㗎，你知道如果想帶小朋友去迪士尼，應該坐邊條綫？
S：東涌綫？(答案：迪士尼綫)
PJ：呢條你應該識，你新碟都有呢首歌，《朦朧夜雨裡》嘅作曲人係邊位？
S：鍾偉強！(正確)
quota經濟學 在 【DSE ECON】教畫International Trade有QUOTA的圖 的推薦與評價
... 考前砌定答題框架，洞悉 經濟 大勢，唔再喺考場先重新再諗，贏埋呢20幾分❗️ 俄烏戰爭篇$28 中美貿戰$28 電子消費券篇$28 美國加息篇$28 【最新】- ... ... <看更多>