大埔雞翼豬扒上海麵/雞批蘋果批/街市
今朝去咗食遠近馳名嘅東記上海麵
其實我覺得未算要山長水遠專登嚟食嘅程度
但係的確唔錯
豬扒唔算嫩係實實在在要咬果種豬肉質地
無肥嘅部份有少少乾
但痴住肥肉嘅位有油香好好味
炸得好好唔會成口油
雞翼無乜特別但隻隻都算大大隻
同樣炸得香脆唔油膩
味道方面無特別係食佢炸嘅功夫
配埋嘅上海粗麵夠彈牙
雙併雞翼豬扒麵$34算抵食
肉好足👍
之後仲去咗附近嘅華輝食雞批蘋果批
雞批做得好批皮唔會濕thethe一pat嘢
啖啖肉好足料
不過個醬汁係非常杰果種有啲似港式白汁嘅味道
食多啖覺得有啲滯
反而鍾意佢個蘋果批
同樣批皮做得好焗得又好批皮先唔會一pat嘢仲好鬆化
蘋果係真蘋果仲拮得起一粒粒蘋果肉
唔係死甜，少甜帶蘋果酸味
好味喎呢個
不過成件淨係食到一粒提子乾😂
各$14件算抵食
不過蛋撻就麻麻地無蛋香
大埔街市除咗出晒名凍肉平嘅梁九記
(我鍾意聯和墟街市果間多啲)
仲有幾間賣香料花茶嘅鋪頭
全部分裝少量賣仲要好平
而且好多比較唔常見嘅香料都有得賣
平過超級市場好多非常抵買！！！
想搵香料又住附近區嘅不妨去果度入貨
果度仲有檔口賣外國蔬菜沙律菜等等
唔係一般街市賣果啲
係超級市場賣到好撚貴果啲
有啲香港難買啲嘅例如zucchini，butternut squash，意大利茄子之類
價錢又係平過超級市場好多！
大埔街市仲出名賣海鮮
又係種類多價錢平
想煮餐靚飯去果度一定買得好開心！！！
