今年討論度最高嘅電視節目非《全民造星》莫屬，近排引起全城追看，一班觀眾仲睇到咬牙切齒添！
事緣上星期 40 強進 30 強嘅表演，由二汶同梁祖堯帶領嘅 A3 組演繹《給十年後的我》，配合布偶公仔演出，搞到全世界哭𠹌佐！演出感動，但就以 0 比 5 完敗於 B2 組，搞到網民嬲𠹌佐！評判之一嘅 Miss Chan Chan 就話 B 組嘅表現比較 powerful，網民大鬧節目造馬，指 B 組勝之不武，而釗峰同阿禮等評判就出 post 解釋揀 B 組嘅原因。
到今個星期 30 強進 20 強嘅表演，A 組扳回一城，多個表演例如 BL 主題嘅音樂劇「我們」、黑魔法音樂劇等，評判同觀眾都非常 buy，暫時連贏 4 round 大炒 B 組！排喺 A 組淘汰榜榜首嘅 Judas，猶如被不死鳥護身祝福，連續 4 次唔洗死，平時木口木面嘅佢都多番啲表情，展露出打麻雀連續 4 圈冧莊嘅勝利笑容。
網上對賽果同節目議論紛紛，日前出席活動嘅花姐都要澄清吓，佢就否認節目造馬，話如果真係咁叻寫到造馬劇本，佢就可以去做電影導演，又解釋完全無干預評判選擇：「點控制呀？即場撳燈我點控制呀？傳出去對我節目都唔好，我點敢？」亦希望觀眾們唔好咁激進，希望尊重番評判嘅專業。
全民造星三季以嚟，部分網民覺得花姐會偏袒某啲參賽者，笑指佢地關係猶如上契，於是幫佢地改「契仔」花名，例如今季就有「契毛」Timo 同「契豆」Ansonbean，花姐就話聽到好忟憎：「我得兩個仔！冇契仔嘅。」
#嚟緊會搞啲全民造星公投
#咁多round入面觀眾最喜愛嘅表演Top5
#觀眾最喜愛嘅參賽者Top10
#仲有最後十強投票
#等大家嘅心水可以反映到啦
#密切留意喇喂
#A組呢round排啲劇目真心正
#B組其實idea上幾吸引但有啲參賽者唔係好駕馭到
#大家講講點睇
