#邊間行自己估 我係H銀行小員工，好聽啲，就係「我打銀行工嘅。」說穿了，咪又係Sales一個。不過，做Sales做到，我要食埋自己Sell嗰嚿屎，呢啖氣我真係啃唔落。你話有咩理由，有個Plan（以下統稱S Plan）唔賣得，全世界就自己畀錢，真金白銀買返個Plan當交數？
我份人就好均真嘅，食得鹹魚抵得渴，每季跑基金數，幾千萬，咪跑囉，我又唔係跑唔到！幾百萬Annual premium（全年保費）嘅保險？都得！其實，銀行啲客真係好有錢的。
不過，S Plan真係搞唔掂！先講呢個Plan點來，話說我間行，就同「B保險公司」簽長約，如果個Plan一年跑夠數，呢間保險公司就會俾返近9000萬我間行。大拿拿9000萬，佢梗係死捽爛捽捽到我變昆蟲。
個問題係，呢個Plan一年3000萬保障，一年要畀大拿拿要幾皮嘢！問世間？有幾多客會一年畀幾皮嘢銀行，去買一個無錢收返嘅保險，真係同你生死相許咩！仲有，要記住，係冇保險Agent跟你的！
Fine，Sell屎係作為Sales份糧包嘅，但要我Sell屎都要時間。「大佬呀，人地『B保險』賣咗個Plan咁多年，都唔係賣到咁多張，你要數都要畀時間我呀老細。」然而，世界是殘酷，老細嘅世界係更殘酷，佢要你今日交，豈能等到聽朝。你上司受氣，唔發洩喺你身上就唔叫上司。
結果，上司A為求交數兼施壓，佢俾咗一皮嘢蚊出來，自己買返張單，今季Target！Done！
同事B為求唔俾老細煩，佢俾咗幾千蚊出來，今季Target！Done！
同事C唔想俾人炒，佢俾咗幾千蚊出來，今季Target！Done！
至於我，「全世界都自己買，你買唔買呀？」上司微笑道，呢個微笑我叫做「鄭子誠式微笑☺️」。對住「有陰謀鄭子誠」，你，仲有得揀咩？結果，我忍著淚，同幾千蚊說：「再見啦，我幾両血！」冇錯，我係完咗今季個Target，但，我冇咗嘅唔止係一個旅行，而一段愛情！我本來有機會去台灣，可能會邂逅一個台妹，發展偶像劇式戀情，依家咩都冇啦！台妹呀~~~~~
即係咁，S Plan係一簽就一年，而我哋以上畀嘅錢，就只係畀到兩個月。兩個月之後？傻豬嚟嘅，緊係Cut單保平安啦！點Cut？Cut咗Auto pay咪得！不過，B保險仍會不停出信追你。
又話說，銀行同『B保險』合約期，今年只係第二年，同事自己的Target自己食，今季食到，下季呢？下季你要搵「朋友」食，再下季呢？又要再搵「朋友」……如事者無限出賣朋友，朋友就不斷收到追保險費嘅信。就算有咁多朋友肯俾我出賣，我都冇咁多個幾千蚊去買保險。
呢間行人工比同行低，留喺度，係Sell人情味。不過當每季全世界要做銀行「血肉長城」去守住呢份單，人情味，又幫補到幾多我銀包流嘅血……
完
by千頌C@堆填區
http://fb.com/winbigwok
