香港迪士尼的2019年, 雖然稱唔上多姿多釆, 但都有重要嘅時刻或者新嘗試係值得紀錄.
以位置劃分, 美國小鎮大街:
1) 園方發展咗大街一個之前未有盡用嘅位置, 用嚟起咗一間售賣軟雪糕嘅戶外甜品店. 未知將來會唔會因應季節而加入更多不同款式嘅甜品.
2) Plaza Inn 由原本美心中菜, 經幾個月重新裝修, 改成另一間美心中菜.
3) 因真正嘅Bibbidi Bobbidi Boutique 喺Storybook Shoppe 開業, Royal Princess Garden 關閉, 至今Plaza Grounds 尚未有其他新節目舉行.
幻想世界:
4) 城堡工程擴建進行, 喺暑假之前仲係未見到有太大嘅進度, 但只用一個月時間就將所有大型嘅組件裝上. 依家逐步加入細微嘅裝飾, 預計2020年落成, 具體日期留待園方公佈.
5) Storybook Shoppe 店內重新規劃, 將大部分範圍改建成Bibbidi Bobbidi Boutique. 留返小部分嘅位置繼續經營售賣公主產品嘅商店. 實在估唔到一個本身咁細嘅位置可以放得入咁多嘢之餘亦無損整個體驗.
6) Arendelle 工程開始, Fantasy Gardens 內嘅心形亭因受工程影響而被移除.
7) 因應Frozen II 上映, 香港迪士尼喺電影上映首天為Elsa Anna 換上電影內嘅最終造型. 成為全球首個出現呢身造型嘅Disney Park.
明日世界:
8) 第二個Marvel 主題設施落成, 請嚟飾演呢位超級英雄嘅Paul Rudd 嚟參與開幕儀式.
9) Nano Battle 開幕後, 園方喺設施外加設全新Meet & Greet 位置, 為呢個園區加入更多英雄人物. 改善咗之前呢度只得Iron Man 一位Marvel Hero 駐場嘅不足. 雖然暫時呢個影相位置只得Black Panther, Spider-Man 同Captain Marvel 出場, 但相信之後將會陸續有更多超級英雄登場.
10) 馳車天地清拆工程喺下半年展開, 園方暫時並未有確認呢個位置將會起嘅Marvel 設施係咩. 而網上有消息指出香港版2023~2024年嘅 Marvel 設施將會係Guardians of the Galaxy - Mission: Breakout.
11) 史迪仔以Santa 造型現身, 為明日世界帶嚟罕有嘅節日氣氛.
探險世界:
12) 原野劇場喺萬聖節期間推出Seasonal Live Performance - Let's Get Wicked. 獲得不少正面評價. 甚至乎當活動完結後呢個演出得以延期. 近年罕見. 而當中出現嘅Mother Gothel, 係Disney Parks 歷史上首次登場.
香港迪士尼樂園酒店:
13) 上年推出Frozen Suite, 園方再接再厲, 今年將部分國賓廳套房改裝成Cinderella Suite.
迪士尼探索家度假酒店:
14) 酒店出現多個小型工程同升級, Nemo’s Recreation Reef, 朱古力店, 仲有大堂加入更多迪士尼人物嘅元素.
活動:
15) 樂園同日本德島縣合作舉行日本秋祭, 其實係隆重版嘅Disney Performing Arts, 但見到香港迪士尼邀請到大型嘅表演團體嚟, 甚至乎同其他地方嘅政府有合作同文化交流, 都係幾值得高興嘅事.
16) 園方首次舉辦Disney Night Run, 最後取消; 事隔多年再次喺樂園內舉行嘅除夕倒數派對, 最後亦取消.
商品:
17) 原屬香港迪士尼獨有嘅Duffy 朋友 - Cookie 改名為CookieAnn, 並已喺東京迪士尼海洋同上海迪士尼登場. 不再屬於香港獨有.
