《 回家的感覺 驚險的大勝 車路士對阿士東維拉賽後分析》
.
如果無睇場波的話會喺比數上以為清風送爽輕取對手，但其實上半場驚險境頭連連，要不是文迪精彩既「教材式」表現再加上堤亞高施華護空門，相信車路士經已喺主場球迷面前失威，係運氣還是實力？其實主要都離不開四個字就係「唔夠穩定」。
.
杜曹喺賽前既排陣可以話相當驚喜，三中堅用上施華伙拍魯迪加以及小將查路巴，左翼衛繼續由馬高斯阿朗素擔任，而右翼衛就由奧岱頂替停賽既列斯占士，中場組合就用上高華錫配合新加盟既沙奧尼古斯，至於前場三人就收起左蒙特，用上盧卡古搭薛耶治以及夏維斯，基於陣中多名主力球員都參與住國際賽事，什至大部份都踢足晒咁多場，令杜曹除左作出大幅度輪換外亦急於用上沙奧尼古斯。
.
而上半場既驚險場面好大程度係由哩名馬體會借將所產生，沙奧尼古斯明顯對於英超節奏存在不適應，基本上都無乜太多空間時間作思考對手都已經拍埋黎，加上維拉既三中場相當硬淨，體力化既踢法加上對抗硬度令沙奧尼古斯長期處於下風，最終亦要杜曹喺半場換走，相信黎緊會先由後備上陣開始逐步做起，至少球員都需要時間慢慢重拾狀態，今場波貿然正選可以話係安排上既迫於無奈。
.
雖然車路士今晚波並唔算得上打得好，不過喺射門機會並唔多之下都成功入到對手三球，總算係一改以往拉鋸極都無起色既畫面，而盧卡古所入既第一球亦可以話盡顯功架，相信部份一直唔睇好佢既球迷們都會開始改變過往眼光，高華錫亦鐵樹開花自己打入今季第一球，同時要留意既係兩位球員喺今場波既連接配合可以話相當多，盧卡古背身對抗為藍軍開路推前戰區，所釋出空間比到高華錫能夠更有效咁發揮得到自己最為強項既推進力，哩對組合亦開始有啲舊時迪亞高哥斯達與法比加斯既味道出現。
.
黎緊歐聯戰線即將展開，相信杜曹依舊會保持輪換策略令更多球員可以參與賽事，最重要係希望保持球員健康完成賽季。
.
《岩睇既比個Like支持我地啊！》
作者 : BluexLion車迷手記
-------------------------------
同場加映《車路士轉會窗總結 簽一借一免簽一 車迷們又滿意嗎？》
https://s.fanpiece.com/GbxTZcb
.
#Chelsea #車路士 #阿士東維拉 #英超 #杜曹 #盧卡古 #高華錫
https://s.fanpiece.com/h5qaj2W
車路士轉會 在 香港車路士官方球迷會（球迷討論區）Official Chelsea F.C. ... 的推薦與評價
此群組為香港車路士官方球迷會成立並管理，希望集合香港以至外地喜愛車路士之人仕，一起為愛隊打氣，建立一個帶和諧討論氣氛的官方平台予各位志同道合的車迷。 ... <看更多>