//港男買唔到樓，其中一個原因，好可能係因為有女朋友//
有女友不是買唔到樓死因，有女友但唔肯一齊捱，一齊儲，只會使，就註定GG了。
我係James。
人生果然係由一個再一個謊言堆砌而成！細個嘅時候，老竇同我講，「讀書時唔好拍拖，努力讀書就可以出人頭地」。結果，書我係讀咗，Degree我都有，依家打工份糧都唔錯呀，一個月幾萬蚊！車！我咪又係買唔到樓？出咩人頭地啫？
「喂喂，政府話出首置上車盤呀，仲係市價一半，機會嚟啦！」女朋友阿怡興奮咁講。
「傻瓜，林鄭話要同發展商買現成單位，大佬呀，香港得返地產可以賺大錢，平價賣畀你就一定冇可能，政府貴一貴咁接貨，俾發展商提早套現，官商關係咁密切呀？好危險啫。好嘢唔畀你就當然，仲要有貨都唔會畀多你。」可能我太冷靜嘅分析，由阿怡眉頭眼額，我Feel到佢有啲不滿。「嘩，仲有共享房屋、貨櫃屋…都可以幫到人啩。」
呢啲乜屋物屋，或者可以解燃眉之急，不過大家掉轉諗。今時今日2017年，人人用智能手機、未來世界已經係講緊人工智能講AI，但睇吓香港人嘅生活質素，變成點？變成要行返N年前條路，起臨時徙置區呀！
「你講起就炆陣，明明概念就係徙置區，將佢變咗貨櫃，就變成『型格貨櫃屋』，咪又係玩弄語言。即係好似咩假期咁呀？一舊加咗『隱世打卡』『文青必食』呢類形容喺前面嘅蕃薯，講都講去都只係一舊蕃薯。仲有呀，政府仲敢帶頭講『共享』？你連Uber都打壓、GobeeBike都話犯法，你仲同我講共享。」
結果我嘅炆陣，好明顯令到阿怡好無癮，「去食飯啦。」結果食一餐飯加一個紫薯甜品，又食咗400銀，我計過呀，一個月拍拖使費用咗我4000幾銀，一年即係近5萬蚊。最近我睇過一篇文章，計過數，話每年「拍拖使費」入門價都8萬銀，如果拍6年連通脹，折實50萬。50萬，再加埋自己積蓄，100萬首期冇難度！
「阿囝，讀完書先好拍拖，出人頭地你怕冇女仔？」人生係由一個再一個謊言堆砌而成，隨時代進步，以上呢一句，已經係不合時宜。今時今日，老竇教仔應該咁講，「阿囝，買咗樓先好拍拖，買咗樓你怕冇妞？」，因為港男買唔到樓，其中一個原因，好可能係因為有女朋友。
完
by千頌C@堆填區
http://fb.com/winbigwok
貨櫃屋 犯法 在 [請益] 貨櫃屋算是違建嗎？ - 看板home-sale 的推薦與評價