《阿伯與女》
「其實你究竟知唔知自己想點？」陳伯語氣極其平靜，但暴起嘅青筋拉扯住頸上嘅皺紋，與其話係震怒，倒不如話佢哀莫大於心死…
「既然有錢做乜唔趁宜家走喎？呢排個個都移民啦！」聽陳倩而嘅口氣，彷彿移民只係一呼一吸就可以搞掂嘅事。
陳伯望住女兒說話輕浮，甚至覺得對方撫摸住肚入邊小生命嘅溫柔都極其諷刺，思緒飄回一年前…
-2019年1月-
「爸，我想搞生意。」
陳倩而自畢業之後炒散咗幾年，對人生毫無規劃，唔算無所事事，但叫得過且過。
「吓？」陳伯心諗今次個女又搞咩新花臣。
「我個friend啱啱係美國翻黎，想搵人投資開餐廳。佢好叻架佢，藍帶廚師黎，係個邊都做咗幾年餐廳！」
「人地叻，咁你呢？唔好乜都唔識就摻一腳啦。」
「得架啦！我地上次睇啱咗間鋪位，本身都係餐廳嚟，有曬架餐，頂手做就得，行政野有我個fd傍住嘛！」
「……」陳伯對平日三分鐘熱度嘅陳倩而抱極懷疑態度。
「阿爸，我得架！」陳倩而望住陳伯，眼神堅定。
「你唔好玩啦，做生意好辛苦架，你真係頂得順？」陳伯移開視線。
「我係認真架，你信我啦！」
三年黎第一次，陳倩而終於有咗人生目標，陳伯以為自己可以相信女兒眼中團火，於是賣咗自己一個的士牌俾個女做創業基金。
陳倩而同朋友夾錢係深水埗開咗間西餐廳，大南街鋪租平，於是又開多咗間歐美代購雜貨店係隔離。
「嗱，家用！」陳倩而笑口噬噬，將自己創業第一桶金俾咗陳伯。
「搵個小小錢招積到咁啊死女包…」其實陳伯見到個女咁生性，不知幾開心，殊不知創業難，開鋪有7成事務都係陳倩而合夥人嘅功勞，更何況守業更難。
-2019年12月-
「頂唔頂得住架？」陳伯望住陳倩而眼底個兩噠黑眼圈頗為擔心。
餐廳一開始做得好地地，社運開始後被社區啲街坊杯葛，就算有後生仔唔嫌隔涉特登嚟幫襯，始終都係少咗好多熟客生意。
「滴滴——」手機傳黎合夥人嘅訊息轟炸，想商討餐廳改革。
「得嘅…」陳倩而扶住自己皺得離譜嘅眉頭，將手機翻轉放埋咗一邊。
-2020年 武肺大爆發-
由於政府一系列嘅抗疫措施，回緊氣嘅餐廳又受打擊，雪上加霜。
「頂住，撐過疫情一定會好啲嘅！」
「爸，我諗住quit了…」
「個陣我已經同你講咗做生意好辛苦，你叫我信你，宜家就放棄？」
「你都唔明！」
「上一代經歷過六七暴動，經歷過金融風暴，一樣係咁捱過黎！點解你永遠係咁三分鐘熱度？你究竟知唔知自己想做乜？」
「我唔知啊！得未？」
兩人各自歇斯底里，父女不歡而散。
-2021年4月-
一年黎陳倩而對餐廳嘅業務日漸不聞不問，靠男朋友養同餐廳部分分成生活，但合夥人都頂佢唔住，終於將佢踢走。
與此同時佢有咗bb，來到人生嘅轉捩點，佢再次陷於迷茫之中。而男朋友話香港越嚟越唔係人住嘅地方，勸陳倩而跟佢移民，佢答應咗。
……
「你咁容易被說服，你就冇自己嘅諗法？」時間去翻宜家，陳伯理解女兒難處，但怒其不爭，成日都係臨門一腳縮沙，唔通俾你轉場你就會變好？
「去到英國咪再開餐廳咯！再唔係我翻啲兼職，我就唔信生存唔到。唔通你想睇住個孫係呢個爛鬼地方大？」
「唔係生唔生存到嘅問題啊…係你唔知點計劃自己嘅人生…生性啦！」陳伯頓覺頭痛。
陳倩而唔知點反駁，空氣靜默咗好一陣。
「我過幾日放埋第二個的士牌，之後過啲錢俾你。」
「阿爸…」陳倩而眼眶入邊打轉嘅眼淚唔知係感激定愧疚定後悔……
-2021年7月-
新聞報道機場被飛往英國嘅市民及家屬佔據，影片中拍攝到陳伯含淚道別女兒的一刻。
玻璃窗外飛往英國嘅航班遠去，陳伯全副身家，半生心血，呢世捧係手掌心呵護嘅人就咁離開咗佢。
望住自己兩手空空，陳伯只得苦笑…
-
陳伯燃燒自我奉獻俾個女，最後失去所有。當然阿女唔願捱，對自己人生毫無作為係一大原因。但社會嘅變遷，都係推動悲劇發生嘅重要因素…個個都移民，唔通個個都想移民咩？
#其實你又知唔知自己想點
#論創業與職業規劃的重要性
#全職獵人職捱自救企劃
#FulltimeHeadhunt #全職獵人
新書預購：https://docs.google.com/forms/d/1tjPYjkZpYiQDzv_V3PrKgxj78FUim57G7RDZa6KWBT8/edit
Follow我哋IG：
🔝最新職位空缺：Fillturegroup
🔝最新職場情報及冷知識：Fillturecareercoaching
🔝全職獵人：Fulltimeheadhunter
論創業與職業規劃的重要性 在 #論創業與職業規劃的重要性 - एक्सप्लोर करें - Facebook 的推薦與評價
explore #論創業與職業規劃的重要性at Facebook. ... <看更多>