一個演員一隻汪（上）
阿天，係一個全職演員。
佢演過咩角色？呃……我都唔太清楚。
總之，佢從演技學院畢業後，一直喺度演戲，咩角色都會去試，但做嚟做去都冇人認得。
人人都讚佢演技好，但冇人諗住畀機會佢。
前年，佢終於喺某套電影度，演咗一個有對白嘅配角，但套戲依加都未上，亦唔知幾時上。
「林生，唔好意思，呢個角色已經揀咗人啦。我哋相信，以你嘅資歷，未來會有更多機會。」
阿天對住手機講：「明白嘅，唔該晒。」
佢把聲好輕鬆、好淡然，但我分明見到，佢嘅嘴角一直往下沉。
阿天成日喺我面前練習演技，我知道，呢個係唔開心嘅表情。
阿天收線後，我馬上喺佢面前跳嚟跳去，努力眨眼同伸脷，想做一啲哄佢開心嘅表情。
佢見到我擠眉弄眼，忍唔住笑咗：「旺財都識做戲啊？」
然後，阿天一時興起，用手機拍低咗我個樣，擺上FB。
其實阿天都係拍嚟留念吓，佢平時出post都係得幾個Like，冇諗住有咩回應。
但人生，往往出乎意料，嚇你一跳。
原來狗生，都係一樣。
我條片喺網上瘋傳：「嘩，居然有隻狗識做戲。」「好多表情，好可愛啊！」「救命，我要暈了。」
阿天由一開始嘅驚訝，變成狂喜。
佢拎住部手機係咁喺度笑，我仲以為有電影揀咗佢做男主角。
「旺財，你紅咗啦！」阿天抱起我轉圈圈。
紅？我知道阿天好想「紅」，佢成日話，紅咗先有更多演出機會，唔駛成日做啲冇劇情、冇對白嘅角色。
但我紅咗，咁又點呢？我又唔係演員，我係一隻狗。
阿天好開心咁話：「你紅咗，我就可以同你一齊拍嘢，同你一齊紅。」
我恍然大悟，原來我紅，係可以令阿天開心，咁我要紅啦。
之後，阿天幫我拍咗好多條片、影咗好多張相，要我做唔同嘅表情。
好彩阿天平時練習演技嗰陣，我都好留意佢，照我理解，演戲就係郁自己對眼同嘴。
咁我就係咁郁係咁郁，連個鼻都震埋，絕對係「由外到內，再由內去番外」。
我喺網上愈嚟愈紅，冇幾耐就有廣告商搵阿天傾我嘅代言。
對於酬金、拍攝內容，雙方都冇咩爭議。
直至阿天問廣告商：「我可唔可以一齊去？」
「當然可以，主人可以喺隔離睇住，確保旺財嘅安全。」廣告商答。
阿天支支吾吾：「我係問……我可唔可以，一齊出鏡？」
廣告商呆一呆。
阿天好努力推銷自己：「其實我都係一個演員，我喺演技學院畢業㗎，之前都參與過唔同電影同廣告。我同旺財一齊合作，一定可以令佢發揮得更好。」
「咁好啦。」廣告商答得勉強。
阿天好珍惜呢次機會，不斷叮囑我要聽話，佢自己都好努力咁研究劇本，設計每一個表情、動作。
廣告出街嗰一日，阿天攬住我，喺電腦面前屏息以待。
我哋睇到條廣告，一隻好可愛嘅狗，即係我，喺鏡頭前郁嚟郁去。
但一直到廣告結束，都冇見到阿天。
「我……隻手，摸咗你一下。」阿天將廣告重播，我終於發現阿天隻手曾經出鏡。
阿天摸吓我個頭，冇出聲。
我舔吓佢隻手，想安慰佢。
阿天勉強一笑，將廣告再播一次：「睇吓自己有幾可愛，係唔係好開心呢？」
我唔開心，因為我睇得出阿天唔開心。
「旺財，可能呢次……我都唔係做得好好，不過，我哋繼續努力，一定會有更多機會㗎！」阿天咁樣講。
我搖搖尾，我一定會陪住你。
但「努力就有收穫」，呢個絕對係地球上最大嘅謊言。
我唔係一隻好努力嘅狗，我甚至唔知道，我眨眼、我伸脷、我搖頭……到底係咩表情，代表咩意思咩劇情咩內涵。
但所有人都讚我演技好，好多人搵我出鏡，可能係因為，我可以喺佢哋叫我伸脷嘅時候伸脷，又可能係因為，我喺網上有好多Fans。
而阿天係一個好努力嘅演員，為咗演戲，佢特登去學咗四年嘅演技。
畢業後嘅每一日，佢一係就排戲拍嘢，一係就睇戲、睇書去進修演技。
我哋曾經以為，我紅咗，就會令阿天都紅埋。
但阿天嘅手機成日響，每一個出鏡邀約都係搵我。
其他人對佢嘅稱呼，甚至由「阿天」、「林先生」，變成「旺財主人」。
下集：https://bit.ly/3pAOHyi
將專頁設定為「搶先看」/ "See first"，最新故仔馬上睇！
終極邪惡：https://goo.gl/cF1Q9A
尋找靈魂伴侶：http://bit.do/fvNNF
#短故 #短篇 #小說 #陳美濤 #廣東話 #粵語 #tomatochan #一個演員一隻汪
聽話小說番外 在 #心得分享《心跳不聽話》作者：臣年 - 小說板 | Dcard 的推薦與評價
... 番外則是後續，蠻長的，感覺看了- 總裁小說,婚戀文,娛樂圈文. ... 心得分享《心跳不聽話》作者：臣年. 小說. 2021年11月1日05:20. ... <看更多>