關於 穴吹日文意思 ，我們在網路上蒐集到這些相關的討論、資訊與評價

講開日本姓氏，又真係好多好特別嘅，以前喺日本讀書時，最驚就係記同學嘅名，大多數成個名都係四個字啦，但個讀音就絶對唔會好似我哋咁，幾多個字就幾多個音，對於我呢啲冇記性鬼，連記中文名都想死嘅時候，當時要記啲同學名真係慘過死~~所以我當時就自薦做派功課嗰個，逼自己要記哂所有同學嘅名，大概三四個月終於都記哂~~~不過依家就好多都已唔記得哂lu~~但一啲比較特別嘅姓氏，仲係印象深刻嘅，例如：猪鼻 (I-No-Ha-Na) ［全國約1400人］，同埋曾經幫我搞租屋事宜嘅地產經紀：牛丸 (U-Shi-Ma-Ru) ［全國約2800人］

咁日本其實仲有啲咩好罕有嘅姓氏呢？睇睇截至19年十月日本全國罕有姓氏十位啦 ：

［10th］ 漆真下 「うるしまっか」U-Ru-Shi-Ma-Ka ［全國約70人］
通常見於日本東北地方嘅岩手縣
［9th］ 九十「くじゅう,くと,くつ」 Ku-Ju / Ku-To / Ku-Tsu［全國約60人］
通常見於北海道、日本中部地方嘅石川縣及大阪府
［8th］ 結「むすび」 Mu-Su-Bi［全國約50人］
通常見於日本近畿地方嘅兵庫縣、東京都及大阪府
［7th］ 隅田川「すみだがわ」 Su-Mi-Da-Ga-Wa［全國約40人］
通常見於關東地方嘅群馬縣藤岡市
［6th］ 神風「じんぷう,かみかぜ」 Jin-Pu-U / Ka-Mi-Ka-Ze［全國約30人］
通常見於茨城縣、神奈川縣、栃木縣等關東地方，起源意思為「從北方或高地吹來的風」。 傳說為「神之風」。
［5th］ 絵本「えもと」 E-Mo-To［全國約20人］
通常見於神奈川縣、大阪府及和歌山縣
［4th］ 一尺八寸「かまづか,かまつか」 Ka-Ma-Du-Ka / Ka-Ma-Tsu-Ka［全國約20人］
通常見於日本近畿地方嘅兵庫縣。起源於鐮刀柄長達一尺八寸之傳統。
［3rd］ 努力「ぬりき」 Nu-Ri-Ki［全國約10人］
通常見於大阪府。本身「努力」呢個字嘅意思同我哋嘅中文意思都係一樣，而讀音就讀作「どりょく」Do-Ryo-Ku，同用作姓氏時嘅讀音係完全不同咖！
［2nd ］臥龍岡「ながおか」 Na-Ga-O-Ka［全國約10人］
通常見於大阪府及日本中部地方嘅福井縣
［1st］ 左衛門三郎「さえもんさぶろう」 Sa-E-Mon-Sa-Bu-Ro［全國約10人］
通常見於關東地方嘅埼玉縣浦和市。係呀！呢個係一個姓氏，如果佢姓「左衛門三郎」再取名「三郎」，咁佢就會叫做「左衛門三郎三郎」咖喇！！原來呢個姓氏本來都真係人名黎嘅，古代豪門家族將自己嘅名改為自己領土嘅名，而後代子孫就將呢個地名用作自己嘅姓氏。

其實仲有好多都好特別嘅姓氏：「猪口」、「水落」、「小粥」、「不動」、「樹神」、「百鬼」、「兜」、「亀頭」、「鼻毛」、「中出」、「「白紙」、「茄子」、「八角」、「雨夜」、「禿」、「虹」、「降魔」、「夢」、「二十八」、「海老」、「醤油」、「鼻」、「一」、「幸福」、「白髪」、「四十」、「四季」、「夜桜」、「鴨脚」、「父母」、「王子」、「日本」、「温泉」、「観音」、「部屋」、「狼」、「地名」、「酢」、「薬丸」、「針」、「七味」、「入学」、「塩味」、「蜜柑」、「和室」、「先生」、「知識」、「蛇蝮」、「神社」、「九十九」、「時計」、「五月」、「素麺」、「傘」、「扇子」、「桔梗」、「居酒屋」、「海苔」、「蝉」、「地下」、「乳母」、「砂糖」、「八月一日」、「養父」、「記録」、「父母」、「舌」、「蜆」、「蟹」、「猪」、「箱」、「左手」、「右手」、「味噌」、「袋」、「昆布」、「相撲」、「満足」、「太巻」、「歓喜」、「天国」、「四十八願」、「箱」、「豆」、「氷」、「国宝」、「獅子」、「浮気」(但呢個字嘅日文意思係「花心」喎)、「台所」(日文意思係「廚房」)、「回り道」(日文意思係「繞道」)、「飴」(日文意思係「糖果」)、「見学」(日文意思係「參觀」)、「毛穴」(日文意思係「毛孔」)、…

#大家睇完喜歡或覺得有用就俾個like
#唔嫌麻煩仲會幫手share更感激萬分
#大家幫手like下share下係發帖者嘅出post原動力
#有其他日本野化妝野想知 #歡迎留言 #請留言唔好inbox
#日本 #自遊行 #旅行 #東京 #大阪 #北海道 #札榥 #九州 #福岡 #旅遊
#化妝 #化妝師 #JessUp #JessUpHK #2021JapJessup
#日本姓氏

〈一個在日本的刁民〉撰文：雲海

 以下呢個經驗比較長，大家希望可以耐心小小慢慢睇！你就當我一個香港刁民喺外地遇到嘅情況！
話說3月5號下晝突然間收到消息，話日本政府將會強硬執行由中國包括香港澳門入境嘅人士進行強制14日隔離！身邊好多朋友已經聯絡我問我情況點？我真係一頭霧水！完全理解唔到點解之前日本政府對疫情Hea到爆，甚至我認為所有日本武漢肺炎確診數字都係假嘅時候（因為我認為日本政府為咗東京奧運會會不惜一切，包括做假！）突然剎那間強硬到咁，而且講到明會暫時取消香港人嘅日本免簽證（後來知道包括特區護照同埋BNO持有人），咁我就即時要處理離開辦法，要知道我係因為有事情要做，一個月內兩次要去福島核電廠附近「考察」！我原本3月5號就係由福島返到東京，喺香港訂唔到6號7號嘅回程機票，就唯有8號啦！但黃昏嘅時候日本政府再確認所有強行實施隔離政策係由3月9號開始！咁我係坐3月8號黃昏6:10日本航空公司班機回香港，咁就剛剛擲界了，因為我聯想到，若果這班機深夜飛到去香港，第二日根本就冇人再飛去日本，其實取消嘅機會好大，咁好啦，我就嘗試接觸日本航空公司啦！好嘢到呢，首先根本完全打唔到電話俾佢哋，佢哋網站亦都刪除埋原本有嘅電郵地址！再喺網站留咗句說話：依家太多人接觸佢哋冇辦法會回覆之類！咁即係點呢？若果3月8號班機取消咗，之後短期內都好難返到香港！而我有一個難處，就係3月9號下晝其實我係要去醫管局旗下嘅診所攞藥，其實我已經帶晒所有藥，只能捱多一個禮拜到！咁點算好呢？咁我就即刻去查東京飛關島再由關島飛香港嘅航班，呢個係我之前諗定嘅plan B，美金都帶足啦！點知原來關島直飛香港嘅航班已經取消晒，一定要經馬尼拉，咁一來菲律賓對港人都有隔離限制，二來人質事件之後我話咗以後唔去菲律賓！咁好啦即刻去check東京飛曼谷，曼谷飛返香港嘅航線，正當想選擇邊班航空公司之際，就收到消息話泰國對港人亦都執行14天隔離令（後來消息就更加混亂），莫講話泰國消息混亂，其實日本呢邊嘅消息更加亂；首相安培講嘅嘢同外相同厚身省講嘅嘢可以係完全唔同，而且冇一個標準或者統一說法！咁我第一時間諗起嘅梗係搵返香港政府駐東京經濟貿易辦事處啦！由Google查到佢地地址同聯絡方法，咁我就即刻打電話比佢哋啦，由3月5號黃昏6:00開始打打到9:00，一係就冇人聽電話，一係就唔通，再睇清楚上面資料寫到明佢哋辦公時間一至五都係二十四小時喎！原本諗住即刻飛的士過去，諗諗吓都係聽朝先。到3月6號朝頭早10點幾我就坐的士過去，就遇上我其中一次最離奇嘅經驗：我去到正門，有一位日籍女職員即刻上前招呼我幫我撳電梯，我已經覺得好奇怪，冇理由佢會知我嚟㗎？之後佢就問清楚我係咪相關職員（我諗佢以為我係香港政府派來嘅職員）我就話唔係，我只係香港市民，想來查詢問題！佢就面色一變，趕我出去門口個三角開門位，叫我自己撳掣上去啦！（嘩！冇禮貌到呢！）這女士之後從此就消失咗啦！咁係我撳掣嘅同時就見到塊牌上邊寫着原來佢哋嘅辦公時間係上午9:30至到下晝5:30，仲有一個鐘頭lunch time添！等咗好一陣子，先有人係通話機問我咩事？我就用廣東話好清楚咁講：「我係香港嚟嘅想問關於日本政府依家嘅緊急狀態令之下嘅情況！」對方竟然用普通話同我講：「你等一下！」心都實埋！我就企係個三角門口位起碼15分鐘，不斷被開門冷風吹，直到一位聲稱係香港政府之香港人、識講廣東話嘅職員落到嚟用都幾唔好嘅禮貌問我咩事？之後仲要唔俾我進入大門任何比較冇咁大風嘅位置去問問題（原來咁樣對香港人嘅？！我交啲稅結果原來係咁嘅！）我於是乎就向佢發難，同佢講其實我依家係乜嘢都問唔到，仲有關於攞藥嘅問題萬一飛機停航唔知邊個可以幫到我......等等；但你估都估唔到個陳小姐點答我，佢話：「其實我哋呢個辦事處唔係立亂俾香港人可以嚟問嘢就問㗎！（嘩！）你係要預先打電話俾我哋做個appointment，你先可以嚟㗎！不如上網或者打電話俾我哋做咗個appointment先啦！」嘩！我真係火都嚟！我話：「琴晚打咗成晚電話無人聽電話甚至係冇Voice Mail，我點做appointment呢？好啦我我今朝特登坐的士嚟到現場問你你竟然要我做返appointment先返嚟？！」之後陳小姐仲同我講，佢本身自己唔係屬於「查詢部門」嘅同事嚟㗎，而本身比香港人查詢個部門，原本識講廣東話嗰一位職員咁岩今日唔辦公，上面工作嘅同事全部係講日文同英文！若果我堅持要用廣東話問，就幫唔到你囉！仲有仲有，其實你哋香港人唔應該搵我地囉！你應該自己打1823囉！（其實佢不斷講1823我諗佢係講錯咗，其實佢係想講1868入境處熱線，但我已經冇心情修改佢）嘩！！！！之後佢再強硬地繼續講：「陳生！你冷靜啲先！」（呢句真係所有公務員嘅死穴！）我就即刻爆佢：「琴日日本政府突然間頒發緊急狀態令，我哋而家喺日本嘅香港人乜都問唔到，你電話有冇人接！仲要呢上面寫到明你嘅廿四小時運作（後來所有職員都否認呢個說法，仲要聲稱唔知道Google喺上邊咁樣寫，我離開之後佢地就向Google提出修改變返做佢哋嘅辦公時間！）依家你仲要我去做appointment去問問題，你仲命令我去冷靜？！」之後我繼續爆：「你都幾好嘢喎！我有好大對比囉！同樣係香港政府經濟貿易辦公室，喺武漢嘅同事就可以對係湖北省嘅香港人要藥有藥、要食物有食物、要飛機有飛機、要運輸有運輸、要返香港有返香港，而且全部免費！同一個部門對喺日本嘅香港人連打個電話都做唔到！尼個落差巨大得滯啦掛！」陳小姐好似覺得應付唔到我，就想返Office話聲稱會搵佢哋嘅負責人同我講！好！我等！大概10分鐘之後，一時就話俾我聽得一個廣東話嘅職員，一時就成隊講廣東話嘅職員落晒嚟，包括佢哋嘅辦公室老頂阿頭Thomas Wu以及五位來自香港嘅入境處同事！（唔知係咪我話我係Henry Chen觸動到佢地神經呢？）胡生好似做大龍鳳咁，一落到嚟，就大大聲同我講：「陳生，唔好意思！我哋頭先上邊傾緊所以冇落嚟了解.......！」我即刻插嘴：「我諗我唔使再企喺個三角風口位度吹風可以入嚟大堂個可？」我哋所有人之後都企喺大堂張枱仔前邊，因為連一張凳都冇㗎！（真係好想知道駐東京辦事處嘅財政撥款有幾多？）之後胡生想同我握手，我就話防疫時間唔好啦！我於是繼續向胡生發難，都係表達同一個部門駐武漢同駐東京對港人嘅處理方式係落差咁巨大？！連一個應變小組或者電話都冇！！！當然胡生亦都表達其實佢哋尋日知道日本政府嘅公布之後都完全掌握唔到而家嘅情況！同埋都希望幫到我若果日航取消班機攞藥嘅問題，佢哋開頭就討論啱啱過嚟嘅入境處職員會唔會呢兩日幫我攞到，但時間上做唔到，但係佢哋完全唔覺得3月9號之後會幫我寄到藥過嚟（唔知點解湖北又做到個喎？）佢哋就話若果我真係滯留喺日本，暫時返唔到香港，會帶我去睇日本嘅醫生，請日本醫生方面幫我開藥（當然係我自費啦！）而且佢肯俾佢自己嘅卡片及聯絡電話我，有咩事可以搵佢求助，我不得不承認佢嘅公關手段係好好多！但我都向佢強調，係日本唔係得我一個香港人，有咩事要搵佢地求助並唔可能得到咁樣嘅待遇！基本嘅電話查詢都冇？連電話錄音都冇？之後胡生同幾個入境處職員都同我講：「其實你哋最好有咩事都打返入境處嘅求助熱線1868啦！」我即刻打蛇隨棍上話：「1868求助熱線我交過好多次手㗎啦！我唔能夠話佢哋係廢！不過真係完全唔掌握情況同幫唔到手囉！仲要係某程度上佢哋都要聽命於保安局嘅指揮，呢下我覺得好離奇㗎！點解入境處自己唔可以話事嘅呢？太多擲界嘅權力問題！」現場所有人就好尷尬咁望住我，唔知講咩好！咁我就話：「都唔阻你哋繼續開會啦！若果飛機繼續飛就冇問題啦，我滯留喺日本我就搵你地幫手啦！」呢個時候一位日籍職員我樓上Office衝落嚟，表達問咗日本航空公司，3月8號6:10果班飛機會照常，而且仲print咗一張香港入境處1868政府熱線嘅資料俾我參考！我講句唔該一睇，係簡體字版！（反眼）或者我喺湖北嘅話待遇會好好多嘅！我作為一個喺日本嘅刁民，要辦公室嘅阿頭嚟招呼我，我都已經好唔好意思㗎啦！
Ps我剛踏出辦事處門口，就聽到胡生好大聲咁同啲同事講咗一句：「Well done！」我當時心裏面諗，well done咗喺邊呀？我講笑咁講啦，唔通成功將武漢肺炎惹咗俾我所以well done？！要知道全程同胡生講嘢，佢都係冇戴口罩㗎！企喺我半尺位右手邊嗰個入境處職員都係冇戴口罩同我講嘢㗎，呢位職員係特登過嚟處理鑽石公主號港人嘅同事！講真！若果我之後真係惹到武漢肺炎，你都唔好問我個源頭喺邊！