【女皇師奶劇】
兩個英女皇嘅平衡時空，假嘅認真，真嘅胸襟
根據報導，Netflix嗰套The Crown第一季製作費，重多過英女皇出年嘅零用錢！第一季用咗大概九千七百萬鎊，而英國政府批比英女皇2018年嘅「零用錢」係八千二萬鎊。其實講製作費，好多「大國」嘅娛樂公司都出得起。但係講到製作嘅認真加上主角真身一家英國皇室嘅胸襟，睇黎無乜國家可以成就一套咁嘅劇集！
外國劇集製作費高，好多人都識得講「市場大吖嗎！」。場景嗰啲用錢堆砌到嘅，真係無謂講。不過世界上有幾多個製作，係有膽色同技巧拍一個在生嘅國家象徵人物家族故事（而重要响番當地做主要市場喎）。歷史宮廷劇嘅嘢，緊係要加啲創作觀眾先唔覺悶啦。不過要跟據歷史之餘，又要有野史嘅娛樂性，重要唔怕得罪主人翁同啲國民其實係超高難度。認真玩到編劇要同皇室要求，甚至打官司去攞多啲機密資料（關於Edward VIII為咗所謂愛情放棄皇位嘅「情」信）。
拍歷史人物，所謂「忠」嘅歌功頌德，「奸」嘅唱衰講臭好多人都識。但係要追求史實得黎，又要有充宮廷鬥爭。再要加啲娛樂原素，又唔太師奶劇就唔容易。唔好講歷史人物，亞洲區嗰啲連sponsor都驚形容得唔夠英明神武啦（莫講得罪咁大膽）。而就算美國自由到咁講政治嘅劇集，去到最盡都係講個政府然後作個假設嘅總統出黎。
其實另一方面，英國皇室尤其是英女皇就更加勁。唔好講國際上鐘意做show嘅領袖，就算歐洲日本其它皇室都未必容忍得到。講到尾雖然都係暗讚英女皇，但係有邊個老人家係鐘意比人咁完整講家族野史式嘅傳記呢（唔係八卦報紙雜誌零碎咁講下喎）？咪講話係女皇，就算我本人微言一句半句外父外母，佢地（同埋佢地生嗰啲「國民」）都會唔高興啦！
我估Netflix初頭都無諗過The Crown會咁成功，結果近期公布總共會有六個seasons。咁即係個故事明顯去講到好近現代，嗰種平衡時空又真又假嘅感覺真係世間上少有。當兩年一季，即係起碼重有十年八載。咁做Season Finale嗰時，真．女皇即係幾多歲呢？
#真嘅又在生
#假嘅未做完
#劇情點發展
