【狂舞派3】
呢個時代真係有好多創作人、影評人，每個人都會表達自己嘅意見。《狂舞派3》上映已經好一段時間，所以睇咗唔少相關嘅評論或者觀後感，集合起來好壞參半。幸好我唔太特別介意劇透，無抱咩期望入場。睇完覺得節奏流暢，熟悉嘅地方同人物，我同朋友都好喜歡Heyo嘅Hip Hop，今次嗰班工廈artists角色比重可以同第一集嘅主角平分秋色，呢部份我最欣賞。
此片又會令我諗起吉卜力嘅《平成狸合戰》（百變狸貓），城市嘅發展令到嗰班原生狸貓族嘅生存空間消失，佢哋好努力去掙扎，甚至變身成妖怪大遊行想嚇走人類，最後都係死響地盤工地馬路邊，剩低嘅狸貓只好裝扮成人類融入社會生活，可以話係一個sad ending。但全片到底帶出一個咩訊息，好視乎睇嘅人有咩背景、同用咩角度去理解詮繹。時至今日，不妨可以再思考一下。
一路以來黃導演嘅作品都會滲入大量貼地嘅生活元素。最感觸當然係觀塘區，裕民坊嗰檔豆漿豆腐花早就消失咗了。呢套2018年拍嘅電影，其中一個重要嘅意義就係見證呢個舊區消失緊嘅歷史。好笑嘅係，呢幾年自己轉咗行，睇見片中剪片部同事 通宵達旦地努力，嗰副呆滯嘅表情同黑眼圈不禁笑咗出嚟，身邊成日都見到咁樣樣嘅舊同事，忙起嚟一樣不分晝夜。
無意之間揀咗響apm睇呢套戲，散場去買糖水嘅時候，特別響裕民坊影張相，將來回望，曾經有過咁樣嘅日子，歡迎嚟到呢個城市。
#狂舞派3 #狂舞派
百變狸貓 在 Re: [閒聊] 蘭斯系列要怎麼補? - 看板C_Chat - 批踢踢實業坊 的推薦與評價