阿Kit又話想打邊爐（真架，唔係我屈佢架！），去左屯門火水爐（旺角有分店），任食有3個價位，3款唔同級數嘅牛，我揀左中間任食安格斯，平日$202，週末$238。店內嘅裝修係「所謂」嘅懷舊港式風格，越來越多舖頭玩呢隻，不過就唔係間間都認真搞，呢間就屬於冇咁認真。其實裝修風格冇乜所謂，但我真係要呼籲全港餐廳老闆，唔好再喺店內用五顏六色嘅光管做裝飾，特別係一啲冷色調，光管顏色會反左落啲食物到，你見到啲牛肉，有啲藍藍綠綠嘅色，只會覺得隻牛中左毒，而唔會覺得碟肉好靚呀，要影相打卡呀咁。真正高手嘅餐廳，設計燈光係會令每碟送擺低都好似打晒燈預備影product shot咁，刺激食客眼球，增進食慾。藍藍綠綠係唔會好胃口左！（不過放題老闆又真係唔想你咁好胃口XD）
沙嗲牛肉湯底好濃沙嗲味，另外有碗沙嗲牛肉畀你食食下加落去。每個煲有兩塊大大舊嘅so call花膠，可以過下口癮。安格斯牛合格，有少少肉味，質地正常食得過，不過扣份量扣得好明顯！我地總共劃左4次，無論你劃嘅份量係幾多，佢都係畀一碟，大約係4-6片（睇每片大細）。港式任食打邊爐，最常見嘅問題就係呢一點！唔捨得畀牛肉客人食！呢個情況我遇過好多次，that’s why我近年食火鍋放題，多數去牛字頭嘅日式火鍋店，均均真真，你劃十碟佢都照畀你，明買明賣，童叟無欺，食得安樂！除左牛，仲有其他港式火鍋食品飲品，選擇大路，品質正常，粒韭菜餃幾飽滿新鮮。份量方面，愈便宜嘅食材佢畀愈大碟，菜嗰啲劃1佢就畀一大兜 XD
食完返黎上佢FB同開飯網睇睇，有唔少評論彈佢服務衛生同食材唔新鮮，我食嗰晚就冇呢啲問題，各位自行判斷。不過畀牛肉咁姑寒，我下次都係食返牛X好過。
———————————————-
火水爐花膠館
地址：屯門屯隆街2號屯門時代廣場北翼地下35-38號舖
電話：25683006
火水爐旺角 在 火水爐冰室火鍋Fo shui Lo 的推薦與評價
除左來堂食可以揀之外，仲可以外賣番屋企打邊爐！ 旺角店訂座：26631087 WhatsApp訂座：62284084. Openrice 訂座 地址： 旺角煙廠街33號朗廷軒1樓 · #火水爐雞煲火鍋 ... ... <看更多>