Search
以下是Sky Sir 友好：棋亮撰文
去年疫情封關帶來一浪負油價，令到很多進取的石油企業，尤其是美國的頁岩油企業轉唔到身，破咗產。就算成功過關的企業，都因為見過風怕黑，寧願把賺到的錢還債，或者回饋比股東，而唔係再係風暴前咁，高槓桿進攻，所以油價已經升返上75美元，但鑽油台開工仍然偏低。此外，各國的碳中和政策，逼使石油企業放棄部份高碳排放項目，令油價進一步上升。
連同其他石化能源的缺產，環球今年最後一季鬧能源荒的機會正在增加，因為油公司都缺乏投資，有機會齊齊減產，可能只有油價受惠，如果怕期貨太高槓桿，又怕手痕亂炒，可以考慮吓油的ETF，其實都係期貨來，唔買得多。
棋亮執筆
以下是Sky Sir 友好：棋亮撰文
上周除了內房股危機外，市傳的北京利益亦拖低本地地產股，但周五地產建設商會表示，並沒有接觸北京人士。市場氣氛低迷，壞消息也會自動實現於股價上。另外，美國仲有四日去傾延至債務上限法案，時間拖得愈耐，個市就會愈無耐性。此外，由去年疫情橫行全球，多家能源企業破產，到現時各國經濟重啟，令到供應不足，成本大漲，歐洲缺氣嚴重外，中國也缺電，因此上周新舊能源股於北水領軍下熱炒，但這些概念來也怱怱，去也怱怱，現時值博率已現有限，但工業股於多種挾擊下，第四季盈於去年高基數下，接下來盤數走樣機會很高。
雖然港股受多項不利因素籠罩住，但周末加拿大釋放孟晚舟回中國，以及中國釋放兩名加拿大公民，中美關係有機會短期轉向，這是市場沒有預料的事，或會引來憧憬，今日會減返啲對沖用的put，持股仍然五成幾，無乜改變。
提提大家，今個星期港股只有四個交易日，另外因黃金周假期關係，港股通將由周三停至下周四，至下周五才恢復，即港股又面臨沒有北水的日子。
棋亮執筆
以下是Sky Sir 友好：棋亮撰文
昨天是恆大一隻美元債的派息日，但據報道，投資者並未收到利息，而該債券有30日寬限期的條款，即仲有得拖下。恆大股價就借假期A股內房反彈，挾升一段，但那邊廂華置仲有幾億股想走，同埋有隨時拉閘無得走的風險，值博率唔太高。手上早前博的國企內房，托賴帳面贏一成左右，一係今日升多棍5%以上走咗佢，一係等到內地放水先走。
昨日港股早段急速抽升，也立刻把周一開的衍生好倉平了，始終有速度的升幅，對期權口價有利，而且期貨從低位彈逾千點，都係唔博太盡。
美國聯儲局議息結果一如預期，值得留意係，市場估計11月開始減買債，至明年中全數退出1200億美元買債措施。其實聯儲局逆回購逾萬億美元，創哂紀錄新高，放水成效已經有限。
另一個需要留意係 ，美國債務上限，周二民主黨以9票之差成功於眾議院通過暫停執行債務上限至明年12月16日的法案，但共和黨就唔多想比佢係參議院到過，今個周末到下周初會有消息，現有經費將於10月1日到期，如果又停擺，對資本市場衝擊比恆大更勁。所以，黎緊都會搵機會買返啲10月put，對沖返極端事件。
棋亮執筆
（持牌人士，無持有127及3333）
