[AMMHK] 一年容易又亞姐，係呀上星期日已經完咗。聽聞今年製作質素好得人驚但有份莫名喜感，令我有興趣睇重播（喺77台香港開電視星期六有得睇，另外仲會播無綫已經播完好耐嘅《無間道》電視劇。香港開電視會唔會變歲月留聲台？）。
仲記得上年《亞洲小姐競選》係威係勢，副總裁 林文龍 請埋太太郭可盈同埋囡囡撐場，今年睇報道唔見咗佢，先知佢已經離咗職，亞視嘅人事變動嘅速度真係符合返一貫表現。咁龍爺去咗邊呢？原來轉咗做亞視旗下子公司「AMM 亞洲心動娛樂 Hong Kong 」嘅副總裁。
上網search過，AMM呢個Online平台喺2019年成立，喺香港、台灣、新加坡同馬來西亞都有center去製作節目。香港呢邊就由林文龍主理。龍爺仲話會請戚其義拍劇！希望度好劇本籌備好先開拍啦，好嘢唔怕等多陣先有得睇，但最緊要拍得成播得出。
講返啲節目先，依家只係得其中一個靈異節目《E娃鬼叫》upload咗頭兩集，都係啲女仔着得性感去靈探嗰類咁啦。最後有個「送暖到陰間」環節，主持們送紙紥家品畀7位馬姐，驚得嚟又有啲搞笑。不過兩集21分鐘+31分鐘唔係好緊湊，尤其是第一集玩碟仙都幾悶吓。放上OTT平台，其實幾多分鐘都冇所謂啦，大刀闊斧剪得吸引啲好重要，如果唔係觀眾好容易click去睇第二啲片。
我最期待係音樂節目《限聚音樂 Hear to Feel》，睇宣傳片應該走清新風格。片裡面仲有啲參與嘅歌手名，包括咗趙學而、Serrini、馮允謙、梁釗峰等等。有新嘅音樂節目睇好開心，香港樂壇其實好多正嘢。不過唔知呢個節目喺《勁歌金曲》、《Chill Club》同埋線上眾多音樂會之外，仲有啲咩新idea？
#個音樂節目會唔會喺全亞洲最大商營電視廠房亞視八廠拍
#仲有個類似明星三缺一嘅直播打牌節目
#林文龍同達哥live打牌
#有冇郭可盈
#但睇人打牌其實好悶
#隔住個mon又冇得依牙鬆槓
AMM亞洲心動娛樂Hong Kong
YouTube >>> https://www.youtube.com/channel/UCTsSh20JYvvFlHQ9NYzj1mg
林文龍同達哥live打牌 在 林文龍,達哥全新直播節目《今晚有牌打》 想知道係 ... - Facebook 的推薦與評價
林文龍,達哥全新直播節目《今晚有牌打》 想知道係咩節目?一定要留意啦! 到底達哥今鋪能唔能夠食糊呢! ... <看更多>