【#毒果早唞不過唔係咁樣唞 - 紅線噤聲 我哋唔做】
新聞噏乜9嘅招牌紅線惡名昭彰，雖受一眾食花生大嘅讀者愛戴，但亦係前線記者嘅惡夢。我哋名聲大到有報館高層指示下屬要小心寫稿避免俾我哋恥笑，某啲報館亦有行家金精火眼監視住我哋Facebook 專頁，一見到紅線就即刻改正；我哋亦時聽聞有中學老師甚至大學教授借用我哋嘅Post作為教材。源自於求學時期老師指正錯誤嘅紅線，本意令學生了解並修正錯誤，但係政權畫嘅無形紅線，只要反對者誤闖就會被當權者視為錯誤，隨時身陷囹圄。
九七年香港正式与祖国接轨之後，各種自由就算《悲釋籮》入面有明文保護，共產政權依然扭盡六壬將集會自由、言論自由等慢慢畫上紅線，到香港人醒覺時，身邊已經滿布用紅線劃出嘅高牆。国安凍結資產令 香港蘋果日報 被迫停運，變相取締香港唯一同政府唱反調嘅主流報章，就係綑綁新聞自由嘅最後一條紅線。香港曾經多姿多采、百花齊放嘅媒體生態被国家機器輾平，一係為生存淪為喉舌跟随党的方向走，一係為自由螳臂擋車成為輪下魂。
唇亡則齒寒，「新聞噏乜9」作為專門恥笑港澳新聞事事旦旦，荒謬絕倫嘅社交媒體專頁，亦依靠香港人嘅共同核心價值：新聞自由、言論自由而存在，先可以自由地恥笑同批評港澳各媒體。我哋出post嘅標準同報館政治取態無關；我哋唔會因為蘋果立場撐民主而鬆手[1]，亦唔會因為文匯大公紅到黑而避談。報料只要係源於港澳主流媒體，同埋具有豐富想像力[2]，就會出街。今日国安扼殺最大反對聲音，下一個目標就係其餘較細規模嘅網媒，最後就到網絡上嘅小市民；有朝一日，被清算嘅可能就係專門恥笑傳媒嘅我哋。即使係咁，我哋唔會因此停止恥笑港澳媒體，用紅線幽默大眾，鞭策進步。
正所謂 #印咗落報紙冇得改㗎喇 ，一篇報道，經過印刷之後轉化為一疊疊報紙，快速發送至每家每户，經讀者閲讀消化，成為意念。即使現今高牆林立，紅線滿布，蘋果日報依然堅持運作到最後，我哋喺度致以最高敬意。
以紅線噤聲，我哋唔做。
[1] 蘋果日報自現任總編15年接手後年年都係出現响我哋Page最多次嘅媒體，17年年度統計合共超過二千次；以當年每日八個Post嘅標準嚟講，佔全年近七成
[2] 總編或編輯部諗到caption
#毒果早唞不過唔係而家唞 #毒果早唞不過唔係咁樣唞
新聞噏乜9柒聞無處不在：
Facebook https://fb.com/upmud9.nu - Twitter / Instagram / Telegram: @newsupmud9
#新聞噏乜9年度最9大獎 恥笑最柒媒體：https://awards.upmud9.nu
見到媒體出錯？報料攻略：https://bit.ly/35qIjls
倒錢落海 資助我哋吃喝玩樂：https://bit.ly/3xmDOnF
總編後話（吹水谷）：https://j.mp/3zQEAvl
ad illustration by 妙計 Muu Design
