關於 我睇咗啲乜嘢sticker ，我們在網路上蒐集到這些相關的討論、資訊與評價

【 #大智若愚嘅最佳典範 - 《七救星》七師傅嘅貼地愛情哲學】

唔知大家最近有無睇好紅嘅《七救星》？有日小編收工搭車無聊打算睇咗一集，之後一個唔小心就睇晒而家播出咗嘅五集... 雖然你每次睇完都想問自己「睇咗啲乜L」，但又忍唔住繼續睇埋入去。可能師傅有種神奇嘅魔力就係，佢成日都好正經咁做埋啲膠嘢，但當你覺得佢份人唔正經，佢有時講啲嘢又好有道理，個感覺都幾奇幻下，亦都造就咗節目唔少非常貼地嘅爆笑金句～ 今次就等小編趁呢個機會，同大家一齊探索下七師傅...嘅哲學世界！
.
「搵另一半要搵一個 肯花時間喺你身上嘅人」

七師傅喺節目中曾經講過：「 有啲男人等咗幾日，等唔到呢就搵第二家喇； 但有啲男人有耐性呢，等五六個月都肯等，等到食到你為止嘅！」相信好多人都經歷過，曖昧期嗰陣，個曖昧對象見等咗排都未有進展，就從此失蹤無再搵過你... 令你忍唔住懷疑，係咪自己做錯啲咩嚇走咗佢，但其實更大機會係，人地等唔切覺得無聊就走咗，甚至一開頭都只係想呃你薯條（按照師傅講法，佢覺得唔一定要講呃蝦條，薯條都得...）。而七師傅就話畀大家知，其實唔使為一個唔願意等你嘅人傷心，因為真正愛你嘅人，喺願意花時間等你一個答案，而無耐性走咗嘅，或者注定係你生命中嘅過客。
.
「唔識欣賞你嘅人 只係佢學識唔夠唔sick嘢」

喺第三集入面，七師傅為咗幫想改善事業運嘅小肥「吸收能量」，帶咗佢去海旁對住個海大嗌，仲叫小肥唔夠大聲都唔緊要，自己可以幫佢千里傳音... 而七師傅就有提到話「一定會有人覺得禾哋好傻」，正如有時有啲人都會覺得佢係神棍一樣，但師傅就話「識嘢嘅人都知禾哋係有料、勁，有時人地欣唔欣賞你，都要視乎嗰個人識唔識嘢」，名副其實「別人笑禾太瘋癲，禾笑他人看不穿」！

雖然七師傅有幫自己「打飛機」之嫌，但其實都係安慰緊小肥，同埋有樣嘢好真嘅就係，職場又好，愛情又好，你永遠無辦法令全世界都鍾意你，但你可以改變自己諗法：「車！咁係你唔識嘢姐！」有時有啲嘢，你知自己咩料就夠了。
.
由於七師傅金句太多，好似「買衫係種善因、得善果🙂」>>> 幫到間鋪（因）自己又有靚衫着（果）、「有時打你，禾都好疲倦，但為咗幫你消孽都無計」，打你其實真係打救緊你...等等等等不能盡錄。有人笑佢太gag，但又唔能夠否認佢嘅真心，例如師傅雖然搶咗（聲稱係攞住先）杜如風個名牌袋，仲靜靜雞賣埋，但佢就攞晒啲錢去買物資派街坊...... 或者大智若愚最適合形容佢，因為喺9下9下嘅背後，七師傅其實有好多大道理～ 最後循例都要講返句：師傅（我）愛你！
.
#有人有師傅全套sticker麻煩DM返小編 #有種正經嘅9味 #9得黎又無啦啦有啲正經位 #集集我都想問到底睇咗乜 #但諗落又有啲道理 #引人入勝 #情侶 #愛 #愛情 #語錄 #拍拖 #香港 #搞笑 #七救星 #viutv #七師傅 #七仙羽 #節目 七仙羽
.
睇咗笑完就算？不如追蹤埋我哋啦！
即Like @港式情侶 HKstyleCouple 收聽更多港式愛情趣事、一齊學識點樣愛❤️
IG : https://instagram.com/hkstylecouple
歡迎DM投稿戀愛趣事/愛情煩惱，我哋等緊你㗎😙！

$30 睇意大利文藝復興名畫 + 無敵海景打卡

香港藝術館近排有正嘢睇，來自佛羅倫斯 Uffizi 嘅一堆名畫無啦啦嚟咗香港，當中包括幾張Botticelli 嘅真蹟！

Botticelli 最出名就係愛神維納斯幅畫，嗰幅咁名貴梗係冇黎香港啦，不過其他嗰啲都好好睇。想當年喺佛羅倫斯每一日Uffizi都排長龍，我住咗三個月都只係入過去一次，兩日前訂飛仲要 8am去先少啲人；而家咁方便喺香港就可以睇到真係好夢幻😍

值得一提嘅係展覽館出面有無敵海景打卡位，點影都靚；職員好有禮貌又會主動介紹展館嘅資料，整體感覺好好，好值得去👍🏼

除咗呢個收費展覽之外，藝術館仲有其他免費展覽，不過講真冇乜好睇。百幾個參展藝術家入面冇乜本地人，多數有大陸背景，大部份係老人家或者已經死咗，而且只幾個係女性藝術家，行咗幾個展覽廳感覺係千篇一律嘅悶。

香港唔係冇高質素嘅本地藝術家，日本人會邀請門小雷去日本搞個人畫展，咁點解香港藝術館唔放佢啲畫？因為佢係本地人？女人？後生？諗諗吓呢個問題嘅時候，朋友提議過去美麗華嗰邊參觀下 plastic thing 間 cafe，呢個畫家係香港女仔，我哋日日用佢啲 whatsapp sticker 傾偈 🤣 去到每人俾咗 $68 買杯嘢飲，都好，今日至少有支持過本地藝術家 😌

#翻開虛構夜誌

3//顏文字飼養員

望住眼前一隻又一隻垂死嘅精靈，我嘅無助感越嚟越強烈。
每一晚我都質問自己，究竟個天點解要比呢種能力我，有咁嘅能力即係話我有任務去拯救佢哋，但係無論我幾努力，我都真係做唔到，時代嘅洪流冇人可以擋住，我用一人之力根本乜都改變唔到，最後，我都只可以睇住一個有一個有人類親自創造出來嘅生命消失沒落。

我仲記得最初我發現我有能力見到眼前嘅呢啲精靈，係中二嘅時候。
我坐喺自己間房，第一次同朋友玩ICQ。
我已經唔記得第一隻精靈係比朋友召喚出嚟定係我自己召喚出嚟，總之就係佢喺對話裏面出現，之後突然之間係我身邊出現。而今日終於即將消失嘅就係佢 - XD精靈。

XDXDXD，嗰個年代個個都係咁用呢兩個英文字母表達好笑嘅感覺。第一次見佢嘅感覺仲好清晰，我打完呢幾個英文字母，就喺螢光幕入面，有一隻細個好似係童話故事書先會見到咁嘅嘢走咗出嚟。你當佢係小飛俠隔離嗰隻叮噹吖，都有啲似樣，手指甲咁大，一彈出嚟，就嚇到我由張凳跌咗落地下度。佢細細粒但係把聲又尖又嘈，佢同我講，多謝人類創造佢出嚟吖，一路以來佢都係網絡入面生存，而我就有特別嘅體質，令到佢哋能夠實體化，嚟到現實世界。佢講完之後突然之間哈哈大笑，笑到兩隻眼咪埋一齊，個表情⋯⋯就真係完全係XD呢兩個字母所表達嘅表情一樣。

之後落嚟佢另一位細細粒嘅朋友就出場啦 - orz，人類表達跪喺度嘅顏文字，當時佢一現身，就跪喺度多謝我令佢實體化，嗰個身姿，我真係見一次笑一次。然後係佢，刪一個尖嘅括號，一個數目字3，再開一個尖嘅括號 - >3< 豬嘴錫錫，佢一飛出嚟就錫左我幾啖啦。佢哋一路現身，我由開頭好驚變到好開心，因為佢哋真係超級可愛！正常嘅，咁唔可愛，人類都唔會創造佢哋出嚟啦～ 慢慢慢慢，聚集左佢哋好多好多個朋友，於是我就將自己衣櫃啲衫搬晒出嚟，將佢哋趕晒入去衣櫃，仲準備咗被鋪呀、玩具呀、飾物呀，令到佢哋一路開開心心咁住喺個衣櫃入面 - 冇錯，就係中二呢一年，我成為咗顏文字嘅飼養員。

不過呢，話就話係飼養，其實呢養佢哋都唔使咩本錢，我問過佢哋有啲咩想食，佢哋話乜都唔使食，佢哋生存嘅力量就係來自一路一路有人用佢哋。
然後嗰幾年，ICQ MSN Xanga SMS你的通訊工具越來越發達，我見證住佢哋越變越肥。嗰隻咁嘅orz，肥都跪喺度嗰陣時jid出咗好多節肚腩。最明顯肥咗嘅呢就係啲弧形開刪括號做面珠燈嘅顏文字，嗰啲脹卜卜嘅面，成日都攞支鉛筆頭篤佢哋幾下，然之後佢哋就會哈哈大笑，同我玩伏匿匿，係我衣櫃啲衫入邊轉來轉去，有時跳入褲袋有時轉入我啲底衫，諗起都好笑。

但係我都冇為意有幾時開始，衣櫃開始變得越來越靜，我同佢哋玩佢哋都唔係好理我。佢哋一隻二隻淨係就咁攤係我啲衫上面，有時候起身行兩步，有時候瞓足三四日。我每日都會打開衣櫃照顧佢哋，但係我知道自己幫唔到佢哋啲乜。因為XD佢有同我講，佢哋已經冇足夠嘅食物，繼續生存落去，只可以慢慢等日子過。

我又點可以比呢件事發生呢？
於是我嘗試不停咁自己用呢啲顏文字，叫埋啲朋友用。
但係時間就好似羊，科技就好似狼，隻狼一路追一路追，隻羊只可以越跑越快，直至俾佢吞食，我哋就會開始遺忘。
Emoji、sticker，gif，呢啲嘢越出越多，邊個得閒理我呢班精靈？

於是我每日只可以打開衣櫃，望住眼前嘅呢堆精靈，一路一路變透明然後消失，數量一路一路咁減少。人類對自己創造出來嘅嘢有時真係可以好殘忍，喺佢哋眼中顏文字只係顏文字，但係喺我眼中，佢哋係生命，唔單止各自係生命，而係我生命嘅一部份，代表着我嘅一個時代，代表着我嘅一段過去。

我最唔明白嘅係，嗰啲新嘅嘢有乜好過舊嘅，好到令到人放棄自己嘅回憶呢？msn有乜嘢好過ICQ？FB有乜嘢好xanga？snapchat有乜嘢好過IG？whatsapp有乜嘢好過SMS? Emoji有乜嘢好過我班顏文字？

呢一晚，喺XD變透明慢慢消失嘅呢一晚，我問佢呢啲問題。
佢咁樣答我。
佢叫我唔使傷心，就算冇嘢進步緊，時代都係咁向前行，人類都係咁適應，呢個就係世界嘅本質。所以係佢實體化嘅嗰一刻，一早已經知道呢一日會嚟。就算佢呢一刻消失，只要我間唔中喺電腦打 XD呢兩個英文字母，佢喺網絡裏面都一樣會感覺到。

講完呢番說話，佢就無聲無息咁，離開咗我個衣櫃。