《七公主》能成功拯救收視嗎？
～ 這劇救唔救到收視？肯定得啦，奧運期間黃金時間平均只得十幾點收視，基數這麼低，頭五集直播收視只要有二十點或二十一、二點，已經可以被媒體用「飈升」去報導。如果頭五集仲係唔過二十點，表示慣性唔睇可能開始形成，不喜歡大台的網友到時又可以搵小鳳姐。
～ 套劇收視會唔會高呢？監製度橋時可能這樣計數，根叔(劉丹)同三個女做骨幹的《愛回家》，平均收視經常有25點以上，《七公主》係根叔同七個女的故事，多左四個女喎，收視照計唔倍升，都應該有三十幾啦！搞下笑啫，數肯定唔係咁計，咁都得嘅下次肯定開《十公主》、《廿公主》啦，反正大台咁多女藝人。
～ 之前宣傳因為香港勇奪首面奧運劍擊金牌，大台食住個勢，提前推出有劍擊內容的《七公主》，為左劍擊熱收看的觀眾肯定失望啦，要去到第四集先有些少劍擊場面，成套劇大體上是《同一屋簷下》式的尋親故事，透過每個女性的不同遭遇，容易泡製一些敢人故事，這種形式容易被家庭觀眾接受，而網民批評的老土重複公式，對大台擁躉來說，正是這劇的優點，他們就是鍾意睇這些公式，大變動如《刑偵》反而好唔鍾意。當然，每個階層都有唔同睇劇口味，啱你口味，睇得開心的，就繼續睇啦，唔駛理別人點講。
～ 既然四個女兒都用了金庸小說的女角名字，不如劉丹的名字由百方改埋做正淳仲襯(段正淳出自《天龍八部》，段譽之父，有一妻及五個情人及五名女兒)
～ 黃翠如擔正女一，自然又遇到大量演技唔得的批評，今次飾演一個為利是圖的大狀，表情硬繃繃，又吊起把聲講對白，真是令人看得唔多舒服。她亦繼續她特有的「環保派」演技，即時無論喜怒哀樂、內心糾結、心慌意亂、晴天霹靂、威迫利誘、嚴詞審問，套人真話⋯，大致都係差不多的表情，相當慳水慳力。不過，這個問題看來不會影響她在大台的地位，因為她夠聽話，《七公主》同《那些我愛過的人》，原來都是臨危受命，放棄休息去頂替李佳芯，憑這點大台一定唔會虧待佢。之前《逆天奇案》中，蔣祖曼「律政女神」的大狀角色設定，同顧靈珊其實大同小異，不過蔣祖曼處理得外剛內柔，不慍不火，個人覺得好睇好多，縱使演技如此，但應該影響唔到黃翠如在大台的地位，做藝人，有時好運重要過好戲。
～ 可以令我睇完頭一個星期，主要因為林夏薇，顧語嫣這角色好睇過《逆天奇案》的Wing姐，她在法庭一幕，之後同靈珊的對立，應該是頭兩集的重頭戲，可惜遇到個「環保派」對手，火花無預期效果，搞到第一集重點變左靈珊那場所謂性感戲。不過語嫣第二集潑屎一幕，又真係睇到充滿黑人問號，首先邊度搵這麼多原材料？當她自己生產，一個沒有私家車的人，又如何運輸咁大筒屎去到法庭門口，仲要等人打完官司出來，才走去潑，點可能無人發現，無人阻止？
～ 另一個交足功課的是高寧，但真係有點怕她側邊的「一拳超人」，啲對白好炒耳。點解要咁憎家姐做大狀呢，家姐依足法律程序，沒有犯法，又唔係百分百同衰人打官司，又無害過佢，做乜咁嬲呢？而且自己仲同過黑社會大老一齊，個底又唔算乾淨，有點自相矛盾。
～子誠做好人，仲要去溝女，可能是另一看點。
#七公主 #劍擊呢
左口黑社會 在 【犯聚活動】勝和頭目「左口」元朗擺大壽犯聚被票控「亞視阿 ... 的推薦與評價
勝和」頭目「 左口 」元朗包房擺大壽，宴請門生及友好， ... 黑社會 成員直播講江湖事自稱佐敦揸fit人識盲亨、崩牙駒、上海仔昨日涉嫌 ... ... <看更多>