（四十一）鞦韆
秋夜正濃，晚上11點，了無人跡的白田屋村公園內，昏黃街燈映照下，只有片片落葉在地上吹過翻滾，連夜貓也如默許了般不作額外打擾。
「er…er…」
在旁的鞦韆架，響着生銬鐵鍊移動所帶來的聲響，其中一個鞦韆在擺盪着。
空洞洞的鞦韆，愈盪愈高…
或許這夜寒風太凜冽了吧。
或許，不須這樣文皺皺的語體文也能帶您身處其中吧。
年輕女子阿Mui坐嚮涼亭位，長腿迷你短打，唉，冷風吹，心裡不空虛，時下年青人果然只要靚，就算幾多度都唔驚。
佢正等緊男友仔過黎接佢上樓，一面仲機不離手玩緊voice msg，催佢快d落黎。
唉，年少多好。
睇黎男友仔今晚都係有嘢食，仲要食「到會」！
「er…er…」
send send下，阿Mui發現，附近個韆鞦…
開始郁。
前後咁郁。
佢望一望…呃…無野嘅…大風啫，就不以為然。
「er…er…」 個韆鞦愈盪愈高。
d「er…er…」聲愈叫愈尖。
佢為意到只有左手面個韆鞦係度fing，如果係大風，無理由選擇性吹風架？好奇之下，佢走埋去睇下。
黎到同個韆鞦只有一步嘅距離，佢伸起隻手，拉停左果個fing緊嘅韆鞦。
然後就轉身打算行返去涼亭到。
當佢擰轉身之後，佢聽到後面又再次傳黎「er…er…」嘅響聲。
佢回頭一睇，個岩岩先拉停左嘅韆鞦，好似同佢作對咁，無啦啦又郁過。
佢再次行埋去，整停佢。
今次拉停左後，仲企定嚮前面，睇一睇，睇下會唔會又郁過，睇下係咪設計上有漏洞。
我承認佢呢種Stay Hungry求知若渴嘅好奇態度係非常之咁正面，極有成為偉大科學家嘅潛質。
無事喇，個韆鞦無郁。
跟手佢有d等得唔係咁耐煩，再拎部電話出黎，留多個 msg 俾男友仔。
今次唔係 sweet sweet BB豬腔喇 ： 「點架你！你再唔黎我走架喇！」 。
要一個女仔夜媽媽係到食風乾等，真係無L野吖嘛。飛得啦！
Sorry，激動左少少，呢度係我自己認為嘅。
言歸正傳，阿mui當時順便坐低左係個韆鞦到，無無聊聊踢踢地上d沙石，等覆。
突然！
佢隔離個韆鞦都郁起上黎。
佢向左咁望過去，今次個韆鞦嘅擺動幅度仲大，直頭就好似有人企左響上面玩緊咁。
「er..er..」
佢望住個係咁fing嘅韆鞦，吞啖口水，load下發生緊咩事…
突然佢「嘩」左一聲，有d嘢跌左落佢個頭到，彈左落地。
佢摸摸頭頂，望望地下。
呃…
有一隻小朋友着嘅「白飯魚」跌左係地下。
樹上面…
跌落黎？
佢彎低身，伸手執起隻白飯魚。
據阿Mui 形容，佢執起隻白飯魚果陣，硬係好似感覺到有人行近佢後面咁。佢即刻回頭向後望，一個人影都無。
佢望一望手上面果隻白飯魚，好細隻，應該係四、五歲左右嘅size，隻鞋都幾殘舊，幾污糟下，再哄埋d睇，有d枯葉嚮鞋籠入面。
答答...。
「依喂！頭先有人拍左我兩下？」
呀Mui 突然覺得岩岩有隻手輕輕力咁拍左佢左邊膊頭兩下。
好實在。
佢·擰·轉·頭·
呼…
…無嘢。
淨係見到後面個搖搖板呀、滑梯呀、氹氹轉呀咁，空空如也。
之但係，隔離個韆鞦…
仍然起勢咁郁緊…
「其實唔會大風成咁吖嘛…」Mui心諗。
又諗起頭先好似比人拍左兩下，後頸都當堂寒寒地，唔諗喇！
起身，走人。
就係呢一刻，身都未企得起...
個韆鞦好大好大力咁郁起上黎。
係佢坐緊果個韆鞦！
「嘩呀！」Mui 大聲嗌左出黎，兩隻手捉實兩邊條鐵鍊。
佢形容當時嘅力度直情就好似佢前面同後邊背脊兩邊都企左個人，兩邊都用盡力你推黎我推去咁樣…
佢可以點做？
咪只能夠瞇實雙眼，捉實條鐵鍊，
等停…
個韆鞦盪得好高好高，直頭好似想打個180度咁。阿Mui好驚好驚，不斷大嗌，結果，個韆鞦終於停左，佢都成功即刻逃離現場，方法係... 佢選擇放手，甘甘地跌一嘢，pat pat 落地，輸少當贏。佢真係好驚真係打個環迴360，頭落地就真係邊到都唔駛去。
莫講話「到會」果壇嘢。
出左公園仔，諗住打俾男友嗚呀一下。原來男友已經留左兩個voice msg俾佢。
「喂，做咩錄咁多怪聲比我呀？」
「咁嘈嘅你果邊？係邊呀？」
呀Mui聽完心內打震，咩話？
好嘈，好多怪聲？
頭先公園仔…
明明就只係得自己一個…
於是乎佢噤返之前自己個msg聽一次…
自己，聽一次。
佢拎實電話，慢慢哄隻耳仔埋去。
「點架你！你再唔黎我走架喇！」
呀Mui…聽到眼都突埋…
呀Mui清楚咁聽到，呢個msg後面，有好多細佬仔嘅嘻嘻笑聲，同埋⋯
「小皮球，香蕉油，那兒開花一十一，一五六，一五七，一八，一九，二十一…」 。
有一大班小朋友，係公園到…
唱緊童謠。
嗱嗱嗱…所以話呢，等一個人果陣真係好L無聊無嘢做架，無情情真係多手左都唔知。如果阿Mui男友早d到就可能乜事都無。所以呢，約左人，就準時d啦。
Tag你圍內成日遲到嘅frd，尤其成日話「遲到十五分鐘唔當遲」果d。
Tag 埋夜媽媽仲成日嚮公園纏綿嘅小情侶啦，提提佢，手多還手多，唔好「多手」吖…
真人視聽版：
http://youtu.be/AFaCSnvUIjA
#真人真事 #離奇 #鬼故 #鬼 #靈異 #照片 #不可思議 #高登 #離奇家遮 #恐怖 #文字 #電影 #短片 #鞦韆
小皮球香蕉油那兒開花一十一 在 一八一九二十一，二... - 廣東話資料館Cantonese Museum 的推薦與評價
小皮球 ，香蕉油，那兒開花一十一，一五六，一五七，一八一九二十一，二五六，二五七，二八二九三十一，三五六，三五七，三八三九四十一......... ... <看更多>