小一入學回顧之<優才(楊殷有娣)書院>
呢間一條龍中小學位置特別，小一至小三校舍喺旺角，小四至中六喺將軍澳。雖然地點有d奇怪，但每年都吸引唔少家長報名，原因如下:
1) 資優教育 - 有名你叫「優才」，呢間學校嘅特色就係資優教育，有資優班同資優教育計劃等，仲會俾資優生跳班。
2) 老師們都係專科專教，保證師資優良。
3) 小班教學 - 每班都只係得24-26人，更容易發掘小朋友嘅才華，加以栽培。
4) DSE成績好 - 好多新派直資學校由於年資短，DSE成績唔太突出，優才係其中一間DSE成績非常優異嘅一條龍學校。
面試當日，家長會喺禮堂睇學校製作嘅影片，內容圍繞母女情，全部角色由學生演出，好好睇，又扮得好神似，令人印象深刻，學校真係好有heart。
面試部分，小朋友地會先以15人一組玩遊戲，內容包括砌lego、玩music chair，聽老師講英文故事咁，主要考佢地的專注力、英文同社交能力等。之後，佢地會單對單見老師，老師會問佢地一d個人資料，例如「你讀邊間學校呀?」「住邊呀?」，仲會問中英文看圖填充題，簡單嘅數學推理同加減數等等。面試完，眼見個個小朋友都好開心，估計過程應該幾開心。囡囡同我講d題目都真係幾深，喺咁多間直資面試入面算係比較深的一間。
之後，入左第二輪嘅小朋友，家長會被安排面見老師。呢個時間，家長真係要做足功課，因為學校辦學理念好有特色，要上去佢地嘅網站溫下書，了解過，有準備先好見老師。我地被安排喺朝早見老師，老師好親切，主要問下「邊個照顧小朋友?」「對校舍分旺角同將軍澳兩邊有咩睇法? 會點樣返學?」「對老師專科專教嘅睇法」等等，過程愉快，十分鐘左右就完成。
之後，學校會公佈結果，主要係「第一備取生」以及「第二備取生」。入左「第一備取生」的小朋友，佢地嘅父母會被邀請，參加一個為期差不多一年、一共十節的講座，要計出席率，地點主要喺將軍澳。「第二備取生」就要等「第一備取生」放棄後補上。
第一場講座，目測都有成四、五百人，內容係關於「資優教育」，仲請黎校內一對資優生嘅父母分享育兒心得。上完第一堂就知，原來家長嘅功課唔止聽講座，仲要寫一份一千字，關於育兒嘅閱讀報告。種種都可以反映學校非常重視家長嘅教育理念是否與學校一致，亦希望家長充分明白同掌握學校嘅理念，以免日後錯配。
由於我同先生都冇咩時間上堂，好快就放棄左，但聽囡囡同學仔家長話，小朋友原來仲有第三輪面試，亦係小組形式進行，不過比第一次簡單得多，都係聽故事答問題。
最後，學校會出結果，將考生分做「有條件取錄 - 即是家長要上哂堂、交哂功課先收」同「後補生」。
總結經驗:
1) 考呢間學校，家長要好比心機，要上足堂，交足功課唔係易事，有無比嘅耐性同決心先得
2) 小朋友嘅學術要求唔低，面試問題都唔容易，數學推理、填充題都深，小朋友要預備下
3) 第一輪面試已經有單對單面談，小朋友外向D、活潑D比較有優勢
