【龔成問答信箱】（Q15961-Q15980）
Q15961：
龔Sir，我係你學生，做左d功課想請教下，我初步分析緊太古地產嘅財務數據：
～負面數據～
我將流動資產淨值51.6億減去非流動負債335億，發現佢係負數
～正面數據～
負債表：
2019年流動資產淨值係正數
流動比率係（206億/155億）=132% 合格既；
總負債情況係17% 都ok;
呢五年負債增長唔過快
1）總負債算係多？會扣啲分？但考慮到佢近年又喺內地發展，有潛力，係咪還可以？
2) 請問係咪咁計？係分析佢嘅財務狀況時，我有冇漏咗啲數據冇睇到？
3)分析地產股嘅時候係咪可以唔理咩5年有4年過ROE?地產股通常個ROE都唔過12%因為物業重估？
4) 估值
用上2015-2019年data, 5年中間3年, 6隻地產股(12,14,16,83,101,1972)
平均行業市盈率：7-10倍
太古5年中間3年市盈率：5-6倍
合理市盈率：5-6倍
5年平均EPS：3.59
預計來年有多10%盈利增長
合理EPS：3.59 x 110%=3.95
估值合理區$18-$26
請龔Sir指點下
我係90後，一直覺得價值投資法好岩我，但身邊有唔少同事朋友係度講短炒技術分析，我難免唔心郁郁，覺得自己既心理意志唔夠強大。
我會溫多啲你d notes 睇多啲書，鞏固我對價值投資法既概念。Thanks for inspiring me 龔Sir
龔成老師：
其實我地分析企業的流動性時，最重要是「流動資產淨值」是否正數，如果是正數，基本上已經過關，而太古地產（1972）這方面已經做得不錯，因此無問題。
如果流動資產淨值再減去非流動資產，如果能正數，就更加理想，但這部分不用強求的。
1）至於負債方面，你的資料計算正確，而佢的負債增長不算快，同時不算多，當我地分析佢是否多時，要睇佢的規模，睇其他資產的情況，唔能夠只睇負債的金額。整體來說，佢負債無問題，不用擔心。
2）你計算的大致正確。
3）由於地產股有物業重估，所以我地在進行估值時，要作出一些調整，找出這企業從正常經營得到的盈利，去計算，這樣會比較準確。
4）至於你估值方面，你要確保所用的市盈率數字，都已經進行了調整，將物業重估因素減去。否則會出現了一些偏差。
至於你最後計出的$18-$26，大致正確，這都反映了太古地產的合理區。
至於技術分析，你地有這想法是正常的，我20年前都有這個想法，年輕人心態會較進取，以為這方法能賺錢，當時我輸左幾年先識醒，之後決定永遠唔用技術分析，希望你的朋友早D醒。
------------------------------------------------
Q15962：
而家月供緊2800，但老師講過資產唔可以太集中，請問入到幾多手係要停供？定可以一直供落去？
龔成老師：
盈富（2800）本身是一個組合，當中有50隻股票，本身已能做到平衡的效果，因此，就算多少少都無所謂。
所以你可以一直供，這是一個平穩增值的工具，最少供5年。如果到時你無特別資金需要，可以保持繼續月供。
------------------------------------------------
Q15963：
Hello,襲sir,系咁嘅，我老公上個月入左股9988阿里巴巴，215個陣買嘅...依家跌左...我哋應該點做
繼續定放左佢好？拜托你答下我吖，好迷惘⋯⋯
龔成老師：
阿里（9988）有質素的，加上長遠有潛力，這股可以持有。
中短期當然會較弱，但長期仍是正面，不過，這類潛力股不宜持有過多，如果你持貨不過量，其實無問題的，但就要耐心守。
------------------------------------------------
Q15964：
你好，我今年27,月入23k, 買入2手$22.5 盈富（2800）, 黎緊想月供股票，每月可儲10k。
月供應該大約5-6k.我應該全數買盈富（2800）定分散揀多一隻股票e.g.比亞迪？
同埋請問月供既話應該係銀行定證券行？現時銀行為中銀。謝謝
龔成老師：
如果你無特別心水股，其實可以全部盈富（2800），因為盈富本身是一個組合，這對平衡風險最有作用。
不過，你27歲，可以進取少少，加入潛力股是可以的。你可以考慮盈富（2800）$4500、比亞迪（1211）$1500，保持長期月供。
銀行與證券行都無所謂的，如果你用開銀行覺得無問題，就照用。
------------------------------------------------
Q15965：
龔老師，您好，我想問吓3899中集安瑞科，有空可以幫我分析一下嗎？謝謝你
龔成老師：
中集安瑞科（3899）主要從事廣泛用於能源、化工及液態食品行業的各式各樣運輸、儲存及加工裝備的設計、開發、製造、工程及銷售，並提供有關技術保養服務。
睇翻過往的業務情況，大致穩定，但有時會出現了一些盈利的波動。質素算是中等，規模不大，略有風險。
投資值博率只是一般，但不是零質素，這類股，小注不是不可的。
------------------------------------------------
Q15966：
龔成老師你好！我現時剛剛Freshgrad 23歲，月入28k
一直有理財，計劃每月儲2.5k作投資用、3k現金蓄蓄、2k應急、3k教育，其餘作家用、日常開支、大型消費儲蓄等
股票方面早前買了一手盈富，加每月月供1k
目標係想5年內買到樓（2人單位都差唔多，會唔會太大諗頭）。雖然正職人工穩定，但自知唔足夠，所以現時都積極學緊新技能想發展副業。
想請教吓老師，我現時呢個情況可以點樣改變，令我更容易達到我嘅儲蓄目標呢？
謝謝你嘅時間
龔成老師：
你有理財的概念，但要加大力度。
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。
你現時每月只有2.5k投資，以及$1000月供，是不足夠的，要增加相關比例，月供可以加大到$3000。
同時，要善用現金，現時大市波動，可說是一個有危有機的時期，要好好把握。現金小心運用，在適當時機入貨，同時留有現金不要用盡。
如果你想5年買樓，要加大儲蓄投資的力度，以及想方法去賺取額外的收入，你23歲是黃金期，要盡最大努力把握！
------------------------------------------------
Q15967：
龔sir你好, 大約三星期前, 偶然睇到你的專欄, 今日專程去書局買了你的著作, 十一本都買齊了; 想請問 : 我應該順序由哪本書開始閱讀研究呢 ? 謝謝!
另外, 我會在whatsapp你的助手哪裏, 報讀6月的課堂班 。
龔成老師：
先多謝你的支持，我的書不少都是知識的基礎，要好好閱讀，增加知識！
你可以順次序睇：
《80後百萬富翁》
《股票勝經》
《財務自由行》
《80後2百萬富翁》
《80後3百萬富翁》
《大富翁致富藍圖》
《50優質潛力股》
之後再睇其他。
6月見！
------------------------------------------------
Q15968：
老師，對你而言，邊啲係平穩增值股? 邊隻係潛力股?
利申，我有6千股MTR及一間舊年供完嘅自住物業
除咗MPF外，我每月儲:
1. 2000元嘅儲蓄互助社，現時已儲了15萬左右。
2. 每月供4000元嘅宏利退休保險，預計仲有10年就供完!
龔成老師：
會分析企業的發展，去決定該企業是平穩型還是潛力股，以下是平穩增長類：
盈富（2800）$2000、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）。
潛力股：比亞迪（1211）、中生製（1177）、褔壽園（1448）、小米（1810）。
潛力企業業務增長會較快，但不確定性也會較高，因此有風險有回報，而我地投資的比例也不能過多。
如果你有$15萬資金，就要好好利用，長線持有一些優質股，同時留一定的現金作備用。
------------------------------------------------
Q15969：
老師想請教您～小妹的mpf大約供左18年！50%係揀恒指基金！50%係揀宏X康健護理的！這組合已供大約6年～
現在的情況下我想轉曬100%宏X利息基金！你意見如何？請指敎
另外想請問788中國鐵塔是否優質股及值得投資嗎？
十分感謝
龔成老師：
在股市下跌時，我B地度該轉到股票基金，這是買入的好機會，如果你在平的時候賣出，轉到收息基金，是錯誤的做法。
強積金是長線投資，不用理中短期股市情況，只需按自己的年齡，慢慢進行配置就得。
至於中國鐵塔（0788），有質素的，之前有少少炒概念，所以之前估值有少少貴。
這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。
佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。
考慮到佢的質素、發展能力，這股算是合理區。
由於這股有發展力，可長線。
但如這刻買入，分注慢慢入，可以的。
------------------------------------------------
Q15970：
龔成老師，近來遇到一點點低谷，所以想請教你一點意見。
我今年 27 歲，我是做室內設計的。以前一直都不識儲錢，不識投資。自從上年上了你堂，開始了月供和盡力儲蓄。但因為某些原因，因為一些事，一個月前離職了。
由於現在肺炎的影響，香港的公司，甚至外國的公司，都在一個經濟不好的環境下，都沒有太多請人，因此十分擔心。我自己都很想到外國闖一下，可是現在這環境下真不容易，都很氣餒。
其實我主要想了解下未來，在理財上我應該如何去計劃。我有以下的股票，因為是月供，所以都只是在合理區:
0027 銀娛
410碎股 @ 平均價 52.9
1211 比亞迪
1,129股 @ 平均價 42
1448 福壽園
1000 股 @ 平均價 5.85
2800 盈富
1,124 股 @ 平均價 28.24
823 領展
500 股 @ 平均價 70.85
以上是我的持有股要，股票共十萬元，現金不多，只有五萬。其實我想快點找到工作，再儲多點，所以有點氣餒和擔心。
所以龔成老師，我想看看你有沒有意見比到我，在未來應如何好好規劃自己的理財路。謝謝你！現在繼續努力重温你的筆記和書。
龔成老師：
以你的年齡，是累積財富的黃金期，你上述所持有的，都是有質素，平穩增長股或潛力股，都是適合你年齡投資的，你持有無問題。
而你之前的方向，亦是繼續投資這類股票就得。
問題是你現時現金不多，而你的收入上的風險，因此，就算股市下跌，你也要留一定的現金做備用，不要心急投資。
如果可以的話，就盡量唔好賣出股票，除非到了資金不足的情況。
至於工作方面，我好相信，當我地面對一個逆境，就是突破的機會，我過往都是這樣，久不久都有逆境，但當刻就會想盡方面找出路，找突破，而之後望翻轉頭，就會多謝當刻的逆境。
你可以用長遠發展的角度想想，自己行那一條路是最好的，你的長遠目標如何，怎樣去可以更有效達到這目標。
------------------------------------------------
Q15971：
龔成老師你好，買左你四本書（睇左80後百萬富翁，財務自由行，準備睇股票勝經及年報勝經），覺得好有用
但當中有唔明既地方，當每股盈利增長率係負數，巿盈增長率計出嚟都會係負數，咁係咪代表隻股唔值得投資？
但書中提及巿盈增長率小於1就為偏平，負數又計唔計？另外想問建設銀行咩價位先係合理？謝謝
龔成老師：
如果每股盈利增長係負數，反映這企業盈利出現倒退。
當我地運用「市盈增長率」去計算估值時，要注意3點：
第一：只適用於高增長股，如果該股不是這類，要用其他估值方法。
第二：要用長期的數據，你唔好太著數1、2年數據，要睇長線。
第三，這只是輔助估值工具。你應該用其他估值方法作為核心，同時利用這估值作為輔助作用。
------------------------------------------------
Q15972：
老師你好:最近股市下滑吸引到我呢位新手，亦有留意你的回答信箱，今年28歲。本金有8萬，一開始考慮買入2手煤氣2手港鐵。
現在考慮到港鐵末期息98仙，想改為全數買入港鐵。請問老師我呢個諗法好嗎?
下個月開始月供各2000 1.港鐵 2.盈富 3.還在考慮。可以提供建議?希望你解答。謝謝！
龔成老師：
股息只是我地投資一隻股票，其中一個考慮因素，不是全部。
港鐵（0066）與煤氣（0003）都是有質素的，就獨特性來說，港鐵會較好，至於這股的派息，不差的，但又到高息股之列。
以你的年齡，應該投資平穩增長股，你買這股是適合的，但任何股票，都不應太過集中，你要建立一個「組合」，以平衡風險。
如果你每月可供$4000，你可供盈富（2800）$2500、港鐵$1500，長期進行。現時大市波動，你可以分注投資股票，只要長線、優質就得，但同時要留有現金，等機會進行。
------------------------------------------------
Q15973：
老師，我有d概念想請教。我應該知道投資重點在於「入貨時機」，財富要有明顯增值，就要係便宜價時買入，買入次數可能唔會多，一年可能得一兩機會，重點就係要把握機會重貨。
老師我理解正確嗎？
還有冇其他事項我係要留意呢？
多謝老師指點教導，獲益良多！
正正是你所講「逆流分段低吸筍股」！龔成老師多謝你，我開竅啦！
龔sir：我相信現時我係應該買入現在持有嘅股票正確嗎？
我現時持有2800，12，66，1928，1211，2388，已經到了值得投資嘅區域，我想問我應該買入次序係點呢？
我又想問邊隻可以加大月供呢？現金有10萬。請龔sir指教！
龔成老師：
「我應該知道投資重點在於「入貨時機」，財富要有明顯增值，就要係便宜價時買入，買入次數可能唔會多，一年可能得一兩機會，重點就係要把握機會重貨。」
你的理解正確。
我地進行財富累積，就是要建立一個資產組合，長期持有優質股，所以，「選優質股」「建立平衡組合」這是大方向，而下一個問題，就是用咩價去入，留現金的比例多少。
最近大市好波動，這正是長線投資者的機會，面對中短期不利事件，買入好股長線是方向，而我會建議分注買入，以收貨的模式進行。
至於上述的股票，都是有質素的，你可以先加大盈富（2800），然後考慮金沙（1928）、比亞迪（1211），然後到其他。
------------------------------------------------
Q15974：
龔sir，你好，我買左好多sp, 接貨要100萬，但接貨淨系得1299和823，個價系1299 sp @ 67.5, 62.5 and $70, $57.5
823 sp @$62.5, $65,67.5 ， 12月接貸，請問呢d價是否ok? 這兩個股票長遠還可以嗎？值得接貨嗎？ 心急人上
請你俾少少意見我吧。
正常1299 會受經濟，但長遠保單應該會提升823， 屋村商場為主，今年收入應該不變，因為大部分租戶下年2020先再次續租2021年
龔成老師：
認沽期權，好多人以為右著數，其實未必是很好的工具，因為回報有限，下跌時就要強行買入。「回報有限，風險無限」，所以你見我從來都唔會推。
不過，上述都是有質素的股票，問題不大，你就算接貨都無問題，但你要睇翻這兩股會否在你的組合內太過集中。
------------------------------------------------
Q15975：
龔成老師你好! 請問你對0019 太古A 的看法如何? 我本人持有大概6900股，平均價是90元，都是早年月供回來的，也在前幾年沒再月供
我知太古A 派息很好，業務也穩定，但奈何股價這幾年真的屢創新低點，我每次都要無眼睇，先能克服現在股價比我平均股價低一大截既事實
我有想過再趁低吸納，也想過不如等他升過我平均股價就賣了他，請龔成老師指點迷津，謝謝你
龔成老師：
太古股份公司Ａ（0019）質素只能說是中等，比起這股，我會建議太古地產（1972）。
太古Ａ部分業務有質素轉弱的情況，同時有些業務本質不算好強，例如航空業，這一向都是不太賺錢的行業，前景只是一般。
當然，太古Ａ又不是全無質素，只是較一般，同時增長力不強，這股都可以持有，但如果月供，建議你不要金額太過大。
------------------------------------------------
Q15976：
你好丫 龔老師
可唔可以 請教下
中移動0941 你有咩睇法?
本人 係食息族
龔成老師：
中移動（0941）本質不差的，作為收息股可以，但就不要對股價有太大的期望。
如果你的投資目標是收息，這股是適合的，現價合理，可分注投資，長線持有。
另外，唔好只集中在單一股票，要建立一個平衡的組合。
------------------------------------------------
Q15977：
龔sir, 想請教您，我用左40萬投資股票
72買入2000股匯豐，44.35放左1200股，依家諗緊果800股留低定放？
恆生170入600股，建行7. 2入1600股
繼續持有定放好呢?
我既方向都係想長遠收息
龔成老師：
首先，匯豐（0005）是收息股，唔好對股價有特別期望，所以，持有與否，要睇你的投資目標「長期收息，唔理股價」。
另外，就算你賣出，都不應在$4X賣，要等佢上翻多D先，這個位不適合賣出的。
另一點，你的組合過於著數銀行股，這出現了系統性風險。你最好慢慢轉到其他股票，最簡單就是轉到盈富（2800）。
恆生（0011）、建行（0939）收息無問題，但你集中在銀行股就有問題。
你要設計一個長遠收息的組合，當中要平衡的。
------------------------------------------------
Q15978：
Sir, 我$115.9入左2269，但依家已經穿哂5條平均缐向下落，而且佢招股價$20.6上，所以下行空間好大，我應該幾時可以溝貨？
定係要襯未跌到谷底要止蝕手上個手貨先？一手已經輸緊萬幾蚊，萬分感謝你的回覆
龔成老師：
「依家已經穿哂5條平均缐向下落，而且佢招股價$20.6上，所以下行空間好大」
這是好錯誤的分析！
買股票就是買企業，過往股價不一定能預測之後的股價，全球最賺錢的投資者，巴菲特，都強調你上述用的走勢分析法，是錯誤的分析方法。
當企業有價值，前景正面，股價就會長期向上，反之就會長期向下。
藥明生物（2269）這企業有投資價值的，佢業務正高增長，相信有一定的潛力，不過，最大的問題是估值，現時企業的市盈率去到100倍，已經反映企業處貴水平。
只要佢增長比市場預期慢少少，股價都會受壓。同埋要注意，佢中短期股價會好波動。
這類股，不建議投資得太多，如果貨不算多，可持有，但不要加注。如太多貨，要賣出部分。
------------------------------------------------
Q15979：
可以分析地產股以及盈富基金？謝謝
龔成老師：
盈富（2800）就是追蹤恆生指數，這是一個組合，當中有50隻股票，質素不差，能產生風險分散的作用，加上有平穩增長的能力，所以是十分好的工具。
現價合理，分注投資無問題。
至於地產類，中短期會較弱，特別是收租類別，但這反而對長線投資者來說，有一定的投資值博率。因為香港做地產基本上不死的，持有物業一定有價值，現時只是中短期不利，長遠計，仍是好有價值的。
------------------------------------------------
Q15980：
龔老師您好! 拜讀過您既書，三年前開始理財，不過我既情況比較惡劣，自己搞唔掂，希望您能賜教：
本人已３５歲,一直都係月光族，到三年前睇完您既著作至開始進修，今年讀完ｍａｓｔｅｒ（盼望正職可以加薪）
目前月入：３０Ｋ （扣完ＭＰＦ得２８Ｋ）
家用 ６Ｋ
月供股票領展 ３Ｋ
保險及儲蓄４Ｋ
現金儲備０
要讀書同埋３０歲前做既工好低收入（月入少過２０Ｋ）．所以負債近２０萬
我目標４０歲有１００萬，最終係想老年時過得有尊嚴一些，遲理財所以無咩大志，請問可以點做？
非常感謝!
龔成老師：
你現時35歲，仍是一個財富增值的黃金時期，唔好睇少自己！
40歲$100萬是一個基本的目標，以你最新的財務情況，我希望你可以每月儲到$10000。（唔計保險）
然後，你除左月供領展（0823）外，加多隻月供盈富（2800）$3000。
即是希望你月供$6000，每月儲現金$4000。
另外，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
宏普建設股利 在 宏普建設、基泰股利在PTT/mobile01評價與討論 的推薦與評價
在宏普建設這個討論中，有超過5篇Ptt貼文，作者zkowntu也提到北市大設立「麟洋廳」慶賀王齊麟、李洋希望繼續攻讀博士班ETTODAY 2021年09月09日13:27 ... ... <看更多>