講起唱K
Neway執笠，我呢一個長居歐洲嘅都忍唔住講兩句。
唱K雖然唔係香港人發明，但如果話唱K係香港人嘅集體回憶之一，絕對係當之無愧。十幾歲學生零用錢唔多，可以享受嘅娛樂十隻手指數得晒，但唱K絕對係可以一大班人，一齊開心之餘單成本又唔高嘅活動。就算係大個咗，如果一大班人聚埋一齊，諗唔到有咩做，最簡單Book間房唱K呀！
唱K一出到西方國家，就變晒質。成間酒吧每一台輪流點場，一個二個淨係識得唱Katy Perry嘅Roar，又或者係Bruno Mars嘅Uptown Funk You Up，再唔係黎一首Backstreet Boys 嘅 I Want It That Way。喺外國唱K，
揀歌係要揀係要人人都識唱，而且可以帶動氣氛；你唔講，我以為我搞緊演唱會，sad少少嘅歌都唔敢揀，驚冇人買門票啊頂。
邊似得喺香港唱K，揀歌完全睇心情，失戀可以唱K，開心可以唱歌K，考試得好可以唱K，食飽飯冇嘢做一樣可以唱K。得閒可以嚟首《陀飛輪》，再唔係唱下《囍帖街》或者《櫻花樹下》；能夠鐘之前一定要插首古巨基唱夠十分鐘。
香港人唱歌，緊張嘅係歌詞，憑歌寄意。鬼佬唱歌，緊張嘅係旋律，話知你錯Grammar。你喺班鬼佬面前揀首歌詞靚嘅，啲鬼佬會好唔識貨咁同你講，「點解你廣東歌咁難聽嘅？」（喂，我都未開始唱！ ）唔係我講笑，你如果同一班鬼佬唱K，揀首廣東歌，佢哋唔識欣賞之餘，仲會覺得你搞差唒啲氣氛。
卡拉OK，外國有得唱。但唱出嚟個感覺，完全唔同。唉，唯有沖涼嘅時候，攞住個花灑當嘜唱歌啦。最驚鄰居投訴啫😂
Newway 撐得過沙士，但捱唔過肺炎。唉，可惜啊！
#香港人在歐洲
#香港人
#唱K
#集體回憶
