剛剛過去嗰個星期日，起身嘅時候feel到右邊腹部好痛，好似火燒咁，想食成藥又似乎唔關事，因為我唔係發燒傷風感冒。
按住腹部坐咗20分鐘都冇改善，決定去刷牙同埋洗返噚晚啲杯，呢兩個動作我都唔可以挺直個身做，洗杯嗰陣直情半個身趴住喺廚房鋅盤度洗，啲水濺到我成身都係，忍無可忍去google search下「右腹痛」，佢頭幾個顯示係：「子宮內膜異位」、「月經失調」、「通常還會伴有白帶異味並增」......我心諗google你想點樣呀？
再search「右腹痛 男」，今次第一個顯示係「癌症10大死因就有4個會腹痛」🤦🏻♂️🤦🏻♂️🤦🏻♂️
咁啱有個friend打嚟問我借相機，我話唔舒服，可能係有癌症，佢安慰我：「痴線！可能係盲腸炎咋，睇醫生啦！不過你應該快啲結婚，有時都驚你喺屋企死Q咗冇人知。」
我：「有心喇。」
「我哋成班都結晒婚，你細佬都結埋婚。」
我：「硬係唔習慣屋企有個人一齊生活。」
「我最初同你一樣，出嚟做嘢之後就自己住，雖然後來有拍拖，但冇同居，一個人住嘅日子足足維持咗7年，結婚初期我都唔習慣屋企多咗個人行嚟行去，瞓覺又有個人喺隔離，唔係去旅行一齊瞓幾晚喎，結咗婚係瞓一世㗎喎！仲有打親機嘅時候佢就吸塵，成日『縮腳』、『縮腳』，打都打得唔安樂。」
我：「係囉，好地地一張雙人床變返單人床，打機又要係咁撳停。」
「撳停事小，我老婆瞓覺先大鑊，真係瞓到海星咁，大字型，有時迫到我冇位瞓，佢啲『批踭』我食過無數次，太陽穴、鼻骨、面骨、眼角，全部中過招，最初我懷疑係平時得罪咗老婆，佢扮瞓覺然後報仇。」
我：「咁你都可以習慣？」
「最初以為自己唔慣，直至有一次佢公司出trip，朝早瞓醒好似啲電視劇咁見到旁邊冇人，我先知自己最唔慣原來係老婆唔喺身邊。」
我：「阿嫂而家喺你隔離？你畀把牛肉刀『行』住？係咪開緊speaker？你用摩斯密碼篤兩下，我會明㗎喇。」
「唔係呀，佢落咗街買餸，我講真㗎！自己一個人霸晒張床，霸晒間屋，係舒服嘅，呢樣我都好坦白，真係好free，不過冇咗佢喺身邊，硬係差咁啲嘢，唔知點形容。」
我：「......明白，我feel到自己病情惡化，想休息下先。」
「你聽埋先啦！其實我一直覺得我老婆好純，難聽啲講係好蠢，當年我都驚自己唔適應婚姻生活，不過一諗到佢咁豬好易畀人呃，我就好唔放心，與其佢畀人呃，不如畀我呃啦！」
我：「唔使講咁多喇，阿嫂唔喺隔離，都一定係勾緊線。」
「佢咁豬點會識勾線呀？聽我講啦，如果你淨係想老咗有人照顧，請個私家看護都得啦，但係你娶到一個鍾意嘅人，你係會努力唔畀自己病，努力活得健康啲，因為你唔捨得丟低佢。點呀？你右腹仲痛唔痛呀？」
聽完佢講，我覺得右腹同埋個心一齊唔舒服，攤喺梳化又瞓咗陣，起身之後記起佢嗰句：娶到一個鍾意嘅人，你係會努力唔畀自己病，努力活得健康啲。
右腹痛 在 右上腹痛- Explore 的推薦與評價
explore #右上腹痛at Facebook. ... 肚子痛又稱為腹痛，腹部是人體骨盆和胸部之間的身體部分，在骨盆入口和胸隔膜之間的空腔叫做腹腔，人體大部分的消化道和消化器官都 ... ... <看更多>