話說去昨天去Art Society的西敏寺教堂彌撒，在禮成後散場前，其中一個環節係唱國歌。當音樂一響起，全場人就好自然咁唱God save the Queen，彷彿這是儀式理所當然的一部份。那個時候，我又想起香港嘈到拆天的國歌法。
這幾星期的辯論都是沸沸揚揚，學聯主席張倩盈在立法會表示「聽到國歌想嘔」，而紅底媒體就不甘示弱反擊「習近平登上《福布斯》權力排行榜第一名，那張倩盈豈不是要連個膽都嘔埋出嚟？」呃… 果然是不甘示弱，越示越弱，其實呢… 早兩日先有報紙話一眾內地媒體都唔敢報呢單消息，所以呢… 張倩盈有冇膽我就唔太知，但似乎某媒體就好大膽。喂大佬，唔係收唔到風，呢樣唔講得架嘛？
唔好意思，離題添！返黎國歌呢度先，其實英國好多民間中小型儀式，都唔會唱晒成首國歌，大家都係會唱頭一段就算。如果香港也推出國歌法，又是不是必須要唱足全首才能收貨？大陸版的國歌法是「在公共場合，故意篡改國歌歌詞、曲譜，以歪曲、貶損方式奏唱國歌，或者以其他方式侮辱國歌的，由公安機關處以警告或者十五日以下拘留」理論上只唱部份也算是故意篡改曲譜，那麼執法的尺度，還是會充滿灰色地帶。
講到尾，其實都係信唔過政府。事實上由不誠實使用電腦，到宣誓風波，甚至選舉主任可以判斷別人的意圖而決定是否讓對方入閘，都證明政府其實只要可以玩你，就算再離奇再不合理，都可以硬上。然後建制派的朋友問大家點解唔信政府？我諗，因為… 我地有記性吧？
不過講開又講，其實中國都打完仗咁多年，好多國家的國歌都係讚下自己人傑地靈、自己國家物華天寶之類的。會不會考慮又再換過一首國歌？試想想，要是場景換在香港，大家在教會裡帶著平和感恩的心完成儀式，然後曲風一轉，一陣槍淋彈雨、血肉長城，其實也不太搭調吧？
#其實我覺得換沙里洪巴會開心好多
#再唔係阿里山的姑娘都好喜氣洋洋
#唔好問我點解配圖個背景會係日本
#我揀歌真係差少少
#其實國歌應該首選月亮代表我的心吧
#無論那一代那一國的華人都會唱的歌
#你諗下中國客人在外國機場鬧事唱呢首
#係咪覺得無咁暴力呢
