【你揀呀,揀儲錢結婚定分手?】
喺一啲深夜邪惡食店附近,最多潛在客人嘅地方,我將車頭燈調去細燈,碌住FACEBOOK靜待客人來臨。
天氣愈凍,去食宵夜嘅人愈多,務求將各自歸家嘅時間盡量推遲。睇住四對男女進入之後,終於有一對男女出黎,兩個都戴住同一款貨車帽,似乎係真實情侶。一見咁嘅情況,我即刻關上窗開暖氣,務求唔好流失顧客。
「搭的士好貴呀,你慳啲得唔得?」車門一開,傳來女乘客不耐煩嘅聲音,仲身體力行拉住男人停一停諗一諗,唔似啲口裡說不身體卻誠實地上車嘅女子。不過,男人堅持趕個女人上車:「最多慳啲,去我度先好唔好?咁凍唔好喺街行喇。」溫暖嘅舉動,令我暗暗為呢位暖男喝一聲彩。「梗係啦,唔通仲兜個大圈咩。司機麻煩你先去荃灣再入屯門。」慳家女輸咗上唔上車嘅爭拗,贏返路線決定權,男女相爭司機得利。
落旗開車之後,生米已成熟飯,慳家女都未肯放過暖男:「講極你都係咁嘅,成日話應使則使,咩鬼都應使,你講丫,呢個星期使咗幾多應使嘅錢丫?」暖男尚未構思到適當對答,已經遭受第二波攻擊:「又同呀Silver佢哋打邊爐,又要買新GAME,又話要換季,有邊樣係應該使㗎?頭先又去⋯⋯」慳家女逐樣數返暖男嘅生活開支,由理工大學講到上加士居道天橋,暖男終於搵到機會插口:「呢啲都係使一次啫,好多都係同你出去先使嘅。」唉,少年,第一句都還可以,尾嗰句簡直係花式自殺,點可以喺女人怒火沖天嘅時候將責任分去佢身上呢?就算係事實都唔會被接受。果然,火水一灑,火花四射:「使一次唔係使呀?咩都係使一次,使吓使吓咪使晒囉。淨係話拍拖要用錢,咁第時結婚唔使錢嘅,你係咪想淨係將錢要黎拍拖唔同我結婚呀?你揀呀,揀儲錢結婚定分手?」重磅炸彈一出,車廂唔係即時陷入沈默,而係暖男嘅哈哈聲:「哈哈,點會揀分手呢?我梗係想同你結婚啦,我哋仲要生兩隻豬仔㗎嘛。」嬉笑似乎係暖男常用嘅安撫方法,唔知有無用呢?「你究竟有無概念結婚要用幾多錢?你平時又使咗幾多錢?唔係話唔俾你去街,唔俾你買嘢,你都要知道究竟使咗幾多錢,又有幾多錢係儲起FOR將來用㗎。」慳家女開始無咁激動,睇黎笑容攻勢開始生效。「總之我應承你會儲錢,我哋會有將來。我有諗過㗎,擺酒擺一萬蚊一圍以下嗰啲,實回到本,結婚之後,租屯門啲村屋住住先,儲夠四十萬再加我哋屋企人借啲,咁就買到樓。」認真,從來係最有效手段,聽到暖男咁樣講,慳家女終於肯轉移話題。
抵達荃灣後,暖男先落車,臨落車又要嘴兩啖,浪費我嘅金錢。
暖男落車後仲要一步三回頭,我懶理佢,馬上俾油走。
上到屯門公路,慳家女忽然懶嬌俏咁講:「司機哥哥呀,我哋去咁遠,可唔可以俾個折我呀?」我心諗,你真係咁慳頭先就堅持企硬啲搭巴士啦,翻譯返可以對客嘅語言就變成咁:「ER⋯⋯唔可以呀,我都要儲錢結婚,搵多一蚊得一蚊呀。」慳家女感受到我嘅堅決,都無堅持要折,只係自嘲:「唉,咁我都明嘅,我只係想儲多啲錢啫。你都聽到㗎啦,佢又麻麻煩煩咁,係咪個個男人都係咁玩玩下㗎?」又係呢啲個個男人都係咁嘅言論,家陣你A380咩?點知其他男人點?「唔係㗎,我識好多行家都有儲錢喎,我哋日日現金出糧,唔搵個方法儲錢好易用晒,邊個記得每日每更搵幾多。可能你男朋友有錢先無我哋咁大危機感啦。」眾所週知,好多的士佬呢頭搵嗰頭賭,儲錢真係唔易。「咁你講丫,你哋點儲錢?等我調教吓佢。」慳家女真係唔放過任何一個機會。「好多方法嗰喎,不過主要都係記低收支先囉,仲要有個目標,啲錢儲黎做咩,好似你儲錢結婚咁,咪儲幾多萬影相,幾多萬FOR擺酒。你知啦,我哋搵錢唔多,一個大數咁儲,只會係永遠都達唔到嘅目標,拆散黎儲就好好多。儲得一蚊得一蚊。」「希望佢會儲啦,唔肯儲咩方法都無用。唔儲真係要轉會,我都二十八歲,無幾多時間陪佢癲。」呢句自言自語,相信係慳家女喺車上最真心嘅一句話。講到轉會,我都唔敢搭嘴,專心揸車,漫長嘅屯門公路,喺深夜時分好快就行完。
「到喇,嗰五毫子就算啦,咪話唔益你。攞返張單啦,記低你哋使咗幾多錢呀。」收少五毫主要係懶得找,反正都過二百蚊落袋,唔差在啦。
袋好,MARK低呢程車錢先,乘客嘅開支就係小弟嘅收入呀。吉車返市區時,反思返儲錢真係好重要,希望無儲錢習慣嘅男人睇到啦,如果唔係被人撇咗都唔知咩事。儲錢方法有好多種,我一直用緊『錢家有道』個APPS都方便,睇到呢度嘅都係FANS,俾埋個LINK方便大家:
IOS: https://goo.gl/29MyGc
Android: https://goo.gl/VRX4np
#儲錢結婚 #錢家有道 #儲起嘅個案終於有用
#lazytaxi #我的你的紅的 #的士 #taxi
Search