【重要】有關毛記勁曲總選…
（對於我嚟講係全年最重要嘅事）
尋日除咗場波令人振奮之外，仲有另一件十級好事發生喺我身上..
當我離開公司趕往旺角大球場嘅時候，
有毛孩打電話嚟話：「總選！！終於有Title Sponsor喇！！！」
你哋係唔會感受到，當我聽到呢個消息嗰一刻，係有幾咁激動…
我諗連嗰位同事都Feel唔到，因為我一如以往只係冷冷咁回應咗句：「正喎。」而實際上，我已經感動到喺地鐵上面…濕都眼晒。
兩個月前，當我哋決定搞總選，我就知道冇Sponsor嘅話，就乜都唔洗搞。於是平時唔見客，費事黑面黑親人哋嘅我，就跟埋Sale屎同事們，一齊走訪咗十幾間Agency，希望由最熟識呢件事嘅我嚟Present，可以令大家了解多啲呢件事，希望佢哋肯陪我哋癲，幫我哋將呢個Idea傳開去，最重要嘅係，希望可以傾到最重要最重要最重要嘅Title Sponsor返嚟。
頂我以為自己好似Steve Jobs咁掂啦，實冇死啦，但好明顯，我係完全失敗咗，應該係我塊面確實係黑得濟嘅原故…大家聽完我Present之後，大多數都係冇乜畀反應，就好似聽完個癲佬喺度發癲一樣，膠都費事畀。
之後憑住Sale屎同事嘅努力，同埋一啲Agency嘅幫忙，係試過有幾個Brand表示過有興趣嘅，只可惜即使過到第一層，就過唔到第二層，過到第二層，都未必過到高層，過到高層，最後都死晒喺啲高高層手上。平時落我哋廣告就易，但一講到要Title Sponsor咁親蜜，啲Brand就大多數都係耍手擰頭。
死亡原因有好多，但我知道，其中一個好主要嘅原因，好簡單，就因為做得高高層，多數都唔係幾識毛記電視，就算識，佢哋都覺得你好渣。毛記搞總選？食得㗎？一個個咁斷晒，次次都係空歡喜一場，到最後，我接受咗，呢個世界，係冇人會Title Sponsor毛記電視。
聽日都要開始宣傳總選喇，其實我原本真係放棄咗，諗住算啦，鬼叫自己貪玩咩，係會硬蝕一百萬（頒獎典禮只做得一場，賣晒飛都一定要蝕），但都冇辦法。點知…
點知，我放棄咗，但我啲同事冇放棄到，喺宣傳出街前兩日嘅尋日，Shell Shell Shell Shell Shell Shell Shell（好重要所以要講七次）話Title Sponsor我哋呀（！）
你知唔知有人肯Sponsor我哋，對於我嚟講，係幾咁大意義？？？
唔係講錢呀！係呢個行為，代表咗有一個主流Brand，願意正式肯定毛記電視呢類非傳統媒體；
唔係講錢呀！係呢件事，代表終於有主流Brand，唔係當我哋kai子（雖然真相係，我哋都真係幾Kai下...）；
唔係講錢呀！……其實都係講錢，有咗Title Sponsor，如果可以賣晒啲飛，我哋就可以打平手！甚至賺少少（不過睇嚟都幾難賺少少，因為有同事喺得知有Title Sponsor之後，已經光速同我講：喂，而家多咗少少製作費，可以買嗰個Props啦？）
個意義係：
有人肯／敢Sponsor毛記勁曲總選
原來毛記電視唔係Kai㗎…
呢件事，我感動到…我感動到…
我決定呢一年都只會去Shell入油，我再呼籲所有支持毛記電視嘅觀眾，嗰班成日扮廢青嘅有車廢中，呢一年都要去Shell入油，至於嗰班堅係廢青嘅，就記住第時揸車時要幫襯Shell！
最後，因為我冇機會上台攞獎嘅關係，藉住呢個機會我想多謝我嘅同事，多謝Shell嘅同事。最最後，要多謝Paco！
最最最後，聽日開始正式宣傳了，Are you 唔識串？你哋準備好未？
咩呀？你已經準備好？
但我哋未準備好呀…第一條宣傳片仲剪緊……
#毛記電視第一屆十大勁曲金曲分獎典禮
你好渣 在 你好,渣男- song and lyrics by 阿明AMk, 雪碧說唱| Spotify 的相關結果
Listen to 你好,渣男on Spotify. 阿明AMk, 雪碧說唱· Song · 2019. ... 你好,渣男20193:20. Sign in to see lyrics and listen to the full track. Sign up. 阿明AMk. ... <看更多>