*嚴禁劇透*
*粗口自行過濾*
*可瘋狂話戲屎但免外表批評人身攻擊*
[1230隔夜超短劇評][TVB][福爾摩師奶EP02]
[讚] 有人被殺、Judy落難入羈留室之後，個劇情緊張好多。個個都有嫌疑，陳煒演嘅包租婆、Ben哥哥演嘅前管家一夫都似乎同件案有關。我估丁月嗰個披肩可能係包租婆啩？（本來我想估埋女管家有冇份殺人，但BigBigFun投票冇得揀佢）
Judy同埋曉堯都因為丁月案而陷於人生谷底，一個冇錢可能要賣身葬母，一個被人屈入羈留室為同房出頭畀大頭綠衣侮辱。兩段互相穿插都唔錯，係要睇吓下一集點樣令到呢兩個淪落人再遇而又相扶，一齊住入包租婆嗰度。兩段比較，明顯江嘉敏嗰邊有氣氛啲，食糕同畀包租公迫都未有氣氛，但一去到丁月自己捱凍都要曉堯對腳暖，再加曉堯漏夜去義莊幫丁月着返對鞋嗰吓，氣氛立即出嚟，江嘉敏自己一個人獨腳戲都交足功課。
[彈] 松松姐姐喺個鐵欄後面，容易做啲互動嘅係同囚嗰三個女人。溫裕紅、周麗欣、陳婉婷交咗功課，但唔知點解劇組係唔畀佢哋同Judy多啲對手戲。Judy貴為爵士夫人，嫌棄佢哋就只有一入去嗰時噴香水覺得佢哋臭。之後就冇乜地位唔同而設計嘅衝突。唔會放低尊嚴食飯又係得個講字，完全感受唔到Judy好餓。最簡單就係嗰三個女同囚加兩句，話爵士夫人依家同佢哋一樣嘅地位都好呀。另外同Ben哥哥隔住個鐵欄做戲真係好難，Ben哥哥出行力但個交流唔係好多。當然Judy對一夫一直抱住懷疑係一個大嘅原因令到Judy唔會放咁多感情落去，所以松松姐姐呢個位係難做嘅。你睇佢畀個大頭綠衣壓個頭落地下啲粥度，啲戲就出返嚟。（btw，我真係接受唔到松松姐姐畀人折磨呀…）
[未能分辨] 一夫話自己搵煙鬼榮而最後佢死咗，練更隊去到搵佢時佢係坐喺枱旁面。一夫就同Judy講話返到去屋仔見到煙鬼榮死咗喺地下。到底係劇組出錯，定係一夫講大話呢？唔知道……
[演員表] 陳松伶 飾 祖迪費查 / 黃智賢 飾 關一夫 / 陳煒 飾 鮑妹娣 / 徐榮 飾 狄德英 / 江嘉敏 飾 丁曉堯 / 余德丞 飾 游池 / 林韋辰 飾 喬百川 / 杜大偉 飾 白羅拔 / 布偉傑 飾 菲臘費查 / 王綺琴 飾 丁月 / 吳香倫 飾 雲嫣 / 楊卓娜 飾 焦范南茜 / 溫裕紅 飾 女犯人 / 陳婉婷 飾 女犯人 / 周麗欣 飾 女犯人
#1230隔夜超短劇評 #無綫 #TVB #福爾摩師奶 #陳松伶 #黃智賢 #陳煒 #徐榮 #江嘉敏 #余德丞 #林韋辰 #布偉傑 #王綺琴 #楊卓娜 #杜大偉 #吳香倫 #溫裕紅 #陳婉婷 #周麗欣
