［完了吧，如無意外］《我的筍盤男友》- 兼講葉念琛
1. 好，其實一路都想寫葉念琛，卒之有機會。今次細半講套戲，大半講葉念琛。可能更好，因為如果齋講葉念琛，可能就變咗流水帳由第一套講起，又長又悶。
2. 首先講結論，四大賀歲港片，黃子華葉念琛王晶黃百鳴，四套我都會睇。但寫呢篇文之時，只係睇咗黃子華葉念琛。但幾乎可以肯定，葉念琛呢套《我的筍盤男友》，係四套最正常嘅。留意我甚至唔講最好，我好難話你知呢套戲叫做好戲，甚至以葉念琛嘅戲本身都唔係（近年嘅全部唔係）。但只係鬥低，其他幾套更不堪。黃子華我寫咗 (http://bit.ly/3aRCMWC) ，王晶黃百鳴，怕且都唔使點講。但當然睇完先算。王晶黃百鳴即使畀人打入地獄後，其實都仲偶有OK的佳作。
3. 講返葉大導，我在好多地盤嘅個人介紹都提過鍾意佢。好多人都不能置信。雖然我唔係咩咁巴閉，但佢地都不能接受原來我係鍾意「MK活地亞倫」。我得承認，呢個半恥笑嘅花名，改得極好，唔知邊個發明。
4. 亦都有人懷疑我係扮鍾意葉大導，或者特登鍾意葉大導。好似own咗呢壇嘢咁，提起葉念琛就諗起我（佢未去到咁霉），又或者扮與眾不同。甚至係有啲自虐傾向，例如好多明知好爛嘅港片我都入去睇。當然唔只係為咗支持港片咁偉大，亦純粹係為放空。所以你明點解TVB劇咁受歡迎，因為好多人只係想放空
5.但我鍾意葉念琛，絶對係真心嘅。你問同我睇過葉念琛嘅女（都好多條，喂，佢拍咗好多戲，十幾年喎），應該feel 到，我係真心投入，甚至真心被感動嘅。
6. 喂大佬，我第一套睇嘅係2006年嘅《獨家試愛》，仲記得係在美孚影都戲院（但我明明唔係住美孚，又唔係嗰度返工，嗰時就係咁無聊）。唔可以話驚為天人，但真係深受打動。呢啲係就係拍畀我睇嘅！
7.《獨家試愛》係葉念琛嘅第二套戲。而之後咁多套，我全撚部都睇晒。咁我梗係講入場睇啦！幾時都係入場睇先計。《人約離婚後》我睇咗三次！（好八掛嘅應該發現，當時係我結婚前冇耐），《紀念日》我睇咗兩次。
8. 就連我在香港01嘅第一篇文，都係寫Stephy．篇文寫得唔好，費事貼（但要搵仲搵到）。重點係，我同01傾咗一排，但仲未嘔到文，就係到Stephy同万刀甲分手，先觸發到我覺得一定要寫啲嘢。某程度上係因為香港01我先真係變成一個「寫文」嘅人，亦都因為咁我先有個Facebook Page。而與其話我鍾意Stephy，不如話我係鍾意葉念琛鏡頭下呢個港女．
9. 所以你話影響大唔大？
10. 坊間對葉念琛好多批評好多恥笑，你一定聽過，我亦唔使一一駁斥或乜。我甚至覺得，我同葉大導合照時，佢都有啲懷疑我係想去抽水笑佢。（BTW，呢張相好經典，係我睇《獨家試愛》時捕獲佢影。你話，喂，又話在影都睇？呢張相點都唔係影都，況且2006年埃汾邊有咁老？答案係：張相係《獨家試愛》重映（！）嗰時影的，亦因為咁葉大導有出現）
11. 我只講兩樣嘢。第一，你話葉念琛啲戲凈係情情塔塔，係丫，「活地亞倫都係」。但情情塔塔咪就係嗰時嘅我生活嘅大部份。留意葉念琛拍嘅，一般唔係校園故事，又唔係豪門恩怨，就係普通職場男女嘅故事，你同（當年嘅）我。你話呵欠嘅，唔知有乜好睇嘅，我只能好武斷咁話：你根本唔識愛情。或者話：你愛情經驗唔夠。
12.同樣地，又話葉念琛啲戲全部都係偷食三角變—我想講，現實都係咁上下。你嘅現實唔係？恭喜你。咁你好幸福。但我嘅現實係。唔講太多自己嘢（唔係介意，係唔想失焦），但應該好多人知，當年我囡囡就係sort of （不知情嘅）小三，我背住當時正印女友偷食，後來仲有啲轉折，但最後我都係同囡囡結埋婚。呢個小三炮友（唔通一男一女去釣魚？）變埋正室嫁埋嘅故事，好多人都覺得好勵志，勵志過華潤勵致。你可以話因為我係啲咁嘅賤人所以我睇葉念琛，亦可以話因為我睇葉念琛所以我係咁嘅賤人（但明顯係前者居多）。但又係嗰句，唔好咁虛偽啦，你冇做過人第三者？冇搶過人男女朋友？你自己冇，朋友都有啦。我當都係冇，都總有其他人想嚟搞你或你另一半掛。根本現實就係咁，葉大導話齋，情場如戰場 要愛就要搶。你冇畀女人摑過，冇畀人狠狠咁恨過，可能代愛你根本冇真正戀愛過。正如冇跌親過即係你踩得唔夠快，冇飲過海水泳池水即係游得唔夠深（？）
13. 第二，我對葉大導嘅欽敬，正係在於佢啲戲咁多年都可以玩同一樣嘢（其實近年已經唔係）：男男女女，偷食，三角戀。One trick pony．喂，你估易？洛賓的軌蹟咁，係呀，一樓都係呢招架啦，入波呀，吹咩？
14. 李小龍除咗講be water 外，仲有講過，練一萬招嘅人佢唔驚，但佢驚一招練一萬次嘅人（所以唔好睇咁多四仔，專心練好啲傳教士啦）。葉念琛就係呢個一招玩一萬次嘅人。
15. 悶？睇你點睇。正如我一樣（！），其實咩安雅會談呀 (http://bit.ly/2TVopKJ) ，失身記呀(http://bit.ly/2R6wzwZ)，我在個人FB都講過好多次，現實生活更講過無數次。但我啲識咗廿幾三十年嘅朋友都係百聽不厭，因為好似次次都有新嘢—唔係我前言不對後語。而係可能手法唔同，舖排唔同，或者講返一啲我當時嘅諗法，或者一啲冇提嘅細節。
16. 同活地亞倫一樣（所以叫佢MK活地亞倫真係好正），葉念琛可能冇正版活地亞倫嘅智慧，但佢地有樣嘢好似，就係咁多年都係嗰啲主題！一招練一萬次。念念不忘，必有迴響。總好過啲學藝不精嘅人，行都未行好就學走。兩位活地亞倫都係，你擺明知佢會點，擺明係咁genre ，點丫？
17. 葉大導同正版仲有一個共通點，亦係我佩服佢嘅一點，覺得出面低估佢嘅原因：佢地，都係可以只係賣自己個名嘅編導！（另一個應該係彭浩翔）
18. 外國其實唔少見，但香港相對地幾少見。有邊個導編真係可以長期賣自己名？可能係杜琪峰，可能係王家衞嗰啲級數。但佢地都唔係拍死一個類型啦，係咪？
19. 更加堅嘅係，喂，杜琪峰唔多唔少都要靠劉青雲古天樂任達華，王家衞都係要靠梁朝偉。
20. 葉念琛呢？佢真係咩演員都唔使用！唔使特技，唔靠色情，唔使靠賣香港情懷（事實佢啲戲就最本土），甚至唔使點宣傳。難聽啲講你畀堆垃圾佢佢到交到嘢畀你。有金童玉女Stephy万刀甲固然好。但係咪冇咗佢地葉念琛就冇戲拍？唔係咯大佬。佢先係套戲嘅主角，男女主角呢啲只係過客。呢點好重要。佢係一個有好強勁個人風格，可以只賣自己招牌嘅導演。嘿。
21. 唔好恥笑或鬧，仲有一樣嘢。我地講緊商業片，係咪？我地唔係討論緊杜魯福小津安二郎下話？商業片最緊要係乜？賺錢。唔使套套大賺，甚至唔使套套賺，但最好封蝕本門，最好老細唔使輸到仆街。功夫嘅嘢，有票房咪叻仔，冇票房咪返去自己打文青飛機。
22. 葉念琛正係因為賣自己招牌（而我相信佢唔係拎好多錢），所以佢啲戲，全部都唔會高成本，我有理由相信多數都賺錢，至少唔會蝕。所以佢可以開戲長開長有。記唔記得舊文講過？只要不死，就是活著。你冇戲開，你有乜理想都係把撚。
23. 互為因果，葉念琛嘅戲，求其搵啲後生新人去拍就得，新人供應源源不絶，一定唔會貴，紅咗扭計嘅，貴嘅，咪換第個。再加埋班佢長期合作嘅綠葉班底（阿Bob，麥玲玲之類，唔係佢地做乜會上無線唱《好好戀愛》？）(http://bit.ly/2RK03AY) 。佢啲戲又唔使靚景，又唔使特技，仲可以搵贊助搞植入，封晒蝕本門，老細點會唔開心？
24. 仲有樣嘢，你班友成日強調港味嘛。葉念琛嘅戲正係好有港味（當然都用過台灣演員）。因為佢唔使點理大陸票房（雖然係有上的）。點解可以唔多理大陸票房？咪又係成本低，只做香港都夠。
25. 更加唔好講，因為葉念琛，製造咗幾多就業機會畀啲奀星。難聽講句，出面搵老細嫁才俊都靠呢啲叫高啲價。功德無量呀
________________________________________
26. 今次呢套《我的筍盤男友》，講真，冇乜好講。我話好好睇係講大話，你要講情節不合理係大把（但好似冇三角戀噃）。但我想講，至少係完完整整嘅一套戲。要求好低？你可以睇下其他幾套賀歲片。
27. 窮家女孩戀上富家子，屋企人反對，嘩，呢啲情節真係拍咗一百幾廿年。但至少在葉念琛手上都仲係正正常常（唔好咁高要求）。好彩冇出現吳家麗開張支票叫條女開個價嘅老撚土情節。「但食麵包（定鬆餅？）嗰下真係笑咗」。
28. 演員啲表現都算係恰如其份，綠葉配角嘅繼續綠葉配角，陳家樂個look就擺明係劉鳴煒個look，講嘢都差不多，有啲說服力的。
29. 然後到女主角，嗯，真係之前我都唔識，李靖筠Gladys。拿我是個膚淺嘅人，但我第一眼嘅感覺係：喂大佬，咁醜嘅女，還我Stephy呀。或者蔣家旻蘇麗珊都好丫。
30. OK，我知，唔好睇樣咁膚淺，身材都好重要。「但都好似冇」。OK，我明白，想睇女落夜總會嘛。人地係artist(e)，唔係賣樣。聽聞好似其實主力係唱歌，咁當然OK，況且而家好似鍾意呢啲文青女神系（咩係文青女神？冇胸咪文青女神）。同埋，聽聞，其實最後跑出反而可能係呢啲女仔，就係夠型格，唔會睇咗都唔記得。
31. 但我是死士，我寧願相信，葉念琛都一早知佢唔靚（你睇佢咁多年拍過幾多女明星？倪晨曦連詩雅周秀娜鍾嘉欣喎），但正係睇中佢呢點，搵佢演呢個窮家平凡女孩。就係搵個唔靚嘅。雖然現實上Stephy周秀娜都係窮家女孩（窮家女唔可以靚同大胸？姿色改變命運嘛）。
32. 仲有樣嘢，budget．都要講，葉念琛啲戲，卡士係越嚟越弱嘅。嗰時Stephy 万刀甲未算一線明星，但好多人都識，之後仲有佘詩曼周秀娜之類。但到近年就變咗蔣家旻蘇麗珊甚至今次呢位。
33. 但，市道唔好嘛，加上而家葉大導啲戲都冇當年咁收得（互為因果）。自然樣樣慳。你咪理，我覺得一個成功嘅工匠（你唔係當葉念琛係藝術家呀？）理應如此，我都係咁（？！）。老細畀三皮嘢筆直，我咪同你請三皮嘢之中比較好又啱用嘅人。你畀兩皮嘢，我咪同你搵兩皮嘢之中冇咁甩皮甩骨嘅。你畀一皮嘢，我咪搵件甩皮甩骨但至少唔係炸咗你間公司嘅友咯。睇送食飯嘛
34. 除咗影員，仲有好多位睇到筆直係有限的。劇組似乎搵唔到豪宅（但，喂，英皇喎），安排呀幾十億富豪才俊都只係serviced apartment，又算數。但大佬，名流女士佢老母搞生日會，在六公館搞？Seriously？另外，啲佈景版嘅女，亦未免太MK太大陸太O靚模，唔係咩上流party見到嘅女咯。
35. 但，正係限米煮限飯嘛，都係嗰句，不死就是活著，冇戲開我話知你天才橫溢。點先長玩長有？就係唔好蝕錢。蝕都唔好蝕到仆街。你估導演咁易做？咁易做你做咗啦。
36. BTW，當年我在01有篇文，講賀歲片咁多年嘅轉變，然後反映返社會。嗰篇文都幾多人睇，雖則有啲長。可以畀你回下帶 (http://bit.ly/2RMqplL)
