//本Page Patreon經已開通，請訂閱支持本Page運作（估唔到而家Run個Page都係要搵命搏），謝謝！ 連結： https://bit.ly/2TvzIaF //
之前揮刀救人義士被拉，坊間一眾輿論大肆抨擊《立場新聞》影大頭，有心KOL順帶老屈曾經有進行網上直播、但佢唔鍾意嘅人全部都「專影人大頭」。即係我好少拎前線經驗走去撻人，但如果你從來無去過前線，甚至連抗爭現場都無落過去，只係匿響外國一間冷氣房睇直播做冷氣軍師，因為你根本連前線採訪有咩共識大家會遵守、面對咩困難、甚至連最基本運作概念都唔撚識，咁你憑乜撚嘢批評人「影大頭」？
自從612出現大規模衝突開始，有三大現象令新聞報導從此變得不一樣：
1. TVB果種選擇性報導令好多抗爭支持者群起杯葛，大家渴望有更多唔同觀察抗爭發展嘅角度；
2. 因為抗爭參與人數多、同一時間所牽涉嘅地區太廣，只依靠一般媒體根本無辦法顧及所有發生事件嘅情況，於是當係日後一種唔能夠被刪剪嘅警暴紀錄又好、對主流傳媒遺漏嘅補足又好，大家都鼓勵「現場有咩情況立刻拍低」；
3. 相比起佔中年代，社交媒體直播技術又再進一步普及化：任何人只要有一部手機、一個數據無限Plan，幾乎都可以順利做倒直播，而一般香港人亦因為咁，完全習慣咗以社交媒體接收抗爭最新資訊……於是促成咗「公民記者」嘅興起
然後每每響現場只要出現任何重大事件，大家除咗識叫「First Aid」，就係叫「記者！記者！」，因為大家都知道記者就係響政府失效之後最重要嘅監察工具。但與此同時，一方面響拍攝過程期間，難免影倒抗爭者面相，於是又有人會擔心日後被政府利用為檢控證據，而另一方面又真係有藍屍媒體同大陸特務專門響現場影抗爭者，於是「影大頭」就成為咗好多時衝突嘅來源。
但呢樣嘢既然經已響大半年前已出現，為咗避免衝突，響前線記者同抗爭者之間當然已凝聚咗共識，甚至好耐之前經已實施：
a. 只要係去到前線，盡量避免影抗爭者大頭；
b. 遇到「裝修」、「獅鳥」，響件事完結後先至開始拍攝；
c. 唔會同任何前線義士做訪問，最多只係問一般市民同事件目擊
問題卻在於，呢啲共識好多時只有小型網媒或者獨立「公民記者」先會遵守，一般外媒、主流媒體卻係睬你都傻。作為外媒，首先根本好少會同抗爭者溝通，更何況佢地會覺得自己採訪咁多個地區嘅示威都係咁做，無必要特別遷就香港抗爭者。至於香港主流媒體則覺得自己掛正牌頭，無可能會被質疑係藍屍或國安臥底；而且基於「大台」、作為最主流香港人收看媒體嘅驕傲，佢地亦唔覺得要向抗爭者作任何妥協。
而諷刺嘅係，好多前線勇武似乎都默認咗「西媒同主流媒體係高人一等」嘅事實，明明啲外國記者、NOW有線港台對撚住佢地個頭黎影都唔會有咩激烈反應，但細台、獨立記者就影多兩嘢都比人屌，時不時又要SHOW Pass又盛，仲要有時自己個台太偏唔信你係真記者，比人推撞或者倒墨水不時有之；
所以小型網媒同獨立公民記者，而佢地從來都係最自律果班，好多時你睇佢地做直播都會睇倒大部份時間影住地下、又或者開開下直播因為唔小心影倒獅鳥裝修而中止直播重開，避免留底比政府攞倒做證據。但外媒同大台啲鏡頭永遠影得最靚最多人讚嘅原因就係咁解。
跟住就輪到今日嘅幾位主角：HK01、立場新聞同《蘋果》出場，三大媒體分別炮製出三大出賣抗爭者事件──HK01全程直播抗爭者上九龍灣巴士被一網打盡；《蘋果》公佈被捕人士清單以及暴露理大拯救行動過程；然後垃場則係今次揮刀救人義士「大頭」。
HK01同垃場本身都係網媒，但前者財力雄厚過好多主流媒體，而後者則由瀕瀕嗌救命接近執笠，去到反送中抗爭後專搞抗爭直播聲名鵲起，黃絲捐款前仆後繼，如今已榮登年收入以千萬計，堪稱全港最搵錢傳媒頭幾位嘅傳媒公司鳥。簡單黎講，佢地根本一早當咗自己係「主流大台」，根本完全無視上面所講嘅「前線共識」，大頭照影、直播唔Cut──根本出事之前已有無數同類事件發生，分別只在於差佬有無搵倒人而已。
響「揮刀救人義士篤灰事件」發生後，仍然有人要幫垃圾護航話「單嘢一早有其他媒體爆咗出黎，無咩好指責」，作為一個內行人，我就真係要響度講番幾句以正視聽：
首先，講到立場新聞響直播時候影倒大頭，呢樣嘢的確係無可厚非，因為電光火石間有時真係避唔倒；其實好多小型網媒同獨立記者遇到呢啲情況，通常都會好識趣Del咗個直播唔會留底，但你立場並無咁做，咁你話你係「大台」唔駛跟規距我都吹你唔漲；
真正罪無可恕嘅卻係：立場響之後將義士嘅清晰大頭相上載至網頁。
如果你話直播係無意識嘅拍攝，咁上載照片就一定係故意而為之。如果垃場一開始就係以一間中立甚至偏藍嘅媒體定位，咁咪好似共媒01屌兩句之後都奈佢唔何。問題係佢同《蘋果》一樣，都係以同情抗爭者作為定位，企響道德高地R課金同訂閱，咁好自然係會對你響掩護抗爭者上面有更好嘅要求。
但結果呢？毒果又好垃圾又好，平時就講到點樣濟世為懷，一去到報新聞果刻就話要「嚴守中立報導真相」，邊撚度有得兩邊食哂咁撚著數？
其實垃場自從彈起之後，班記者嘅囂張跋扈有唔少人早已領教過，只不過因為垃場係「大台」，大家敢怒不敢言而已。例如之前「立場昇哥」就以自己記者老行尊身份向學生記者發炮，批評佢地點點點唔別專業，我心諗自從抗爭之後，「記者」呢個身份定義經已有好大改變，而當記協班仆街仲係堅持唔肯發記者證比呢堆新冒起嘅「公民記者」嘅時候，你憑乜撚嘢要求佢地要同你嘅「專業水平」睇齊？
更何況垃場報導好撚專業中立咩？你地咪又係Sell情感性消費報導！垃場出事之後，亦開始有抗爭者爆響口，話原來垃場響影前線大頭時，曾拒絕為相關照片做後製加工，話佢地不嬲都唔會咁做──我唔知呢啲指控係真定假，但如果垃場同蘋果仲係借住抗爭者來搵錢R著數，就好應回應下呢啲相關指責，甚至向自己嘅採訪報導不當道歉。
當然，作為觀眾嘅你，某程度上都要為呢種傳媒歪風負責。有邊個睇直播唔想睇倒「最靚」嘅畫面？有邊個有興趣走去睇長期影住地下、有獅鳥裝修發生時永遠唔會影住發生現場嘅直播？當呢啲掛住「深黃」牌頭然後走去出賣抗爭者果刻，你地會唔會呼籲杯葛，定係邊鬧邊課金，變相縱容佢地繼續亂黎？
個社會有幾扭曲，就會有相應嘅採訪模式出現；班觀眾有幾扭曲，亦促成咗有啲咩相應傳媒出現。但無論你有咩判斷，大前提卻係，唔好果堆匿響冷氣房拍片嘅垃撚圾KOL講乜你就信乜，多聽下真係有落場有去前線嘅人話你聽真相係點。人云亦云、只揀自己鍾意聽嘅嘢來聽，咁黃藍屍其實並無分別。
【付費文章】 香城Online新職業：公民記者（序）由「立場昇哥」向學生記者發炮談起 https://www.patreon.com/posts/36836837
九龍灣巴士 在 九龍灣巴士廠 的推薦與評價
九龍灣巴士 廠, Hong Kong, Hong Kong. 103 likes · 2 talking about this · 2094 were here. Local business. ... <看更多>