#飲飲食食最開心
成日都聽到華人朋友話歐洲買野好貴，其實真係睇你識唔識睇準時機出手。今日就等我人妻先生呢個 #炫窮界KOL 教你點樣用最折墮的budget，買到最開心的食材，去煮好每一餐飯。
首先，唔好講咁多，真·魚子醬 原價23歐元（約210港元）折到7歐元（約60港元），唔買真係會俾雷劈架！當然，都要睇下係咪聽日就過期，嗯... 一月底先過期，唔駛諗啦，除夕派對我就開左佢！
另外，一大包煙三文魚做緊半價，拎黎煮意粉又得、整前菜亦得，再唔係整三文治配個酸忌廉刁草醬也是一絕，別想太多，先買為敬！
一碟裝的焗法國蝸牛，適合一眾手殘人士，隊入焗爐翻熱，加幾片法包也是很體面而好吃的前菜，貴嗎？40蚊港紙，平過你食大家樂咁囉...
當然，法國又怎能少了鵝肝？雖然四折真心好抵，但考慮到家裡已經儲備了大量上等鵝肝，只好忍痛放低... 咩叫有緣無份？就係你明知一見鍾情，但雪櫃已經無位擺了。
除此之外，做特價的法國牛角包，擺入焗爐一會就能重生再食，是很好的早餐。（謎：無人想知你早餐食咩囉，唔該～ 🙄）
而呢塊590G的斧頭扒，將會係聽日的晚餐，只是唔知道佢有冇熟成，冇嘅話可能要多花點心思幫佢按摩一下～ Anyway，塊扒靚，總有方法搞得佢掂嘅。
當然，食材又怎能不提生蠔？110港元全箱20隻，可惜即日就到期，我望一望我老公，佢都有點累了，要是我食左20隻生蠔，作為家裡唯一的雄性生物，我擔心佢可能會在今晚耗盡真元，所以，我貼心地買左正價一箱約150港元的生蠔，可以擺到下星期，減輕他的生理負擔。
值得一提的是，每一箱蠔都有獨立的「包裝日期」，大家的共識是「包裝日期+8天」就是保鮮期，距離越遠越易變壞，我買的是26號包裝，絕對可以放到跨年派對大宴親朋！
最後，見芝士特價，求其乜都買點，家裡還有那位德國銀行家朋友送的自家製果醬，剛好就可以配芝士拼盤。
係呀，又魚子醬、又即開生蠔、 又煙三文魚一大堆野，加埋五舊水港紙鬆啲，你上深圳都買唔到呢啲餸。但平並唔等如cheap，只要你識飲識食再識煮野食，就算用再少的預算，你都可以做出令人興奮的派對美食。
#不要讓預算限制你的想像
#只有你未想到的菜
#絕對沒有巧婦難為無米炊
#我講喺歐洲呀
#香港出街食平過自己煮
#你就算罷啦
#一個半鐘交檯齊人先入座除夕只能嗌set
#甜品上左但主菜都未到更加唔駛旨意追嗰杯如同公義一樣會遲到但從不缺席的餐茶
#緣份到了帳單就會啪一聲出現在你檯面
#真係好歡樂
#依家有生蠔同魚子醬
#就可以整豪華版Rockefella_oysters
#用香檳煮蠔
#淨係睇個食譜都覺得奢侈
#我想試左好耐
#煮完再同大家分享吧
#將炫窮帶到一個新層次
#其實食乜都唔緊要
#最緊要係有一班朋友黎陪我玩一晚
#有知音人懂我的料理就很好了
