謝謝方以文:)
陳凱詠 Jace Sofiee Ng 吳海昕 他們真的好好啊
大家一起努力啊!!!
[方以文問兩句][ViuTV][瑪嘉烈與大衛系列 前度 SP01 剪不斷]
之前冇聲冇息咁喺Facebook同埋ViuTV藍App都播咗，我諗好多觀眾都miss咗。依家有機會喇，今個星期五同埋下星期五，晚上2230~2300會喺99台播。喺電腦或者手機睇，始終都唔夠喺電視睇咁正。
係，真係好正。第一集係由黃定謙 WTHimmy同埋 陳凱詠 Jace做男女主角，兩個演員交足戲，好投入。一齊聽吓Himmy點講。（訪問好有愛，大家要有心理準備）睇完你就會feel到Himmy係幾咁鍾意演戲，呢啲演員真係要珍惜。
先睹為快>>> http://viu.tv/encore/margaret-and-david-ex-special…
------------------------------------------
問：《前度》嘅宣傳片出街，網上觀眾都對你哋兩個段片有好好嘅反應。你哋有冇預過咁好迴響？又幾時知道要拍呢個SP，知道時有咩感覺呢？
答：真係真係真係真係真係沒有預計過會有咁好嘅反應。 答「知道要拍呢個SP，知道時有咩感覺呢？」之前，我想先分享一吓當知道要拍宣傳片嗰陣嘅感受，哈。
我記得大概係五月尾左右，嗰陣喺上海休息度假緊。有一日收到導演邀請，就接拍咗《前度》嘅宣傳片。嗰陣真係無諗太多，覺得有得演戲喎，有得拍嘢，正呀，梗係做啦。之後返嚟香港，仲記得好搞笑，喺拍嘅前幾日，都仲未知道對手會係邊個，好多嘢都唔知。
直至到前一日去fitting先知道係Jace（陳凱詠）做對手，我仲即刻打俾佢。電話通咗之後，我叫佢個角色名（本身角色唔係叫Jace，我都唔係叫Himmy，但最後Steve Law導演決定用返我哋真名）。佢仲搲哂頭，話咩呀講咩呀唔明喎，原來佢又係咩都唔知。之後大家先知道喺第二日拍攝就有對手戲。
好驚喜。條片咁好迴響，真係估唔到。出咗街嗰陣，我喺泰國拍緊嘢。有一日休息時，見到蘋果新聞報導咗，之後Facebook又好多人讚同鍾意，真係超級無想過。係好surprising 同開心嘅（按：因為你哋真係做得好嘛，又拍得好） 。之後返咗嚟，忙緊一套舞台劇啦，有一日幫Steve Law拍adidas 嘅嘢嘅時候，佢就同我講ViuTV好鍾意呢條片，仲批咗錢俾佢哋拍SP，寫緊劇本架喇。嗰陣真係開心到爆。因為又可以演戲喇，仲可以再次同一個好好嘅對手合作。（按：我知道你哋可以拍SP時都非常高興）
------------------------------------------
問：先有宣傳片嘅短故事，再有SP長篇少少嘅內容。你哋覺得咁樣對於演SP時有冇咩幫助，定係有啲框架拖住限死咗？
答：好多時候拍嘢都會跳拍，都係拍咗後面先再拍返前面。我覺得今次同平時跳拍嘅感覺都差唔多。所以你話有冇幫助，唔多唔少都有嘅，但就無特別好大幫助，都無限死嘅。
------------------------------------------
問：拍宣傳片時個氣氛一嚟就好正，你哋兩個本身係咪識？點build up一嚟就分手嗰吓呢？
答：本身我地係識嘅，但識得唔耐，一年都冇，唔係真係好熟啦。但大家都有common best fd，所以都會知大家係邊個。有時都會一班人出去玩會見到面，都有講過吓，睇吓幾時可以一齊工作，估唔到真係開口中。同埋之前一直都好欣賞佢架喇，因為佢唱歌好好聽啦，同埋最重要嘅係佢為人俾我嘅感覺好真誠。加上喺好耐之前有睇過佢演出嘅作品，都覺得佢演戲好好、好吸引、好有potential。所以今次可以合作真係好期待、好開心。（按：係咪愛呀，哈利？）
拍攝嗰日，一見到面嘅時候，我有特登唔同佢講嘢。就算係講呢，都一句起兩句止。因為我覺得嗰一場戲講分手冇耐，所以我嘗試鏡頭後用吓呢啲方法，睇吓幫唔幫到大家同件事。嗰陣Jace化緊妝整緊頭，我就去撩吓幫佢整緊頭髮個姐姐，又會係佢隔籬撩吓其他crew，細聲講大聲笑。得閒望吓Jace，之後又繼續同其他人玩吓笑吓。我仲好記得嗰陣阿Jace個眼神，我諗佢真係好憎我，因為好恐怖、好得人驚。 所以我諗到真正拍嘅時候，唔多唔少都會有幫助到件事。（按：演員同埋製作團隊喺鏡頭後做咗幾多嘢只先至有幕前嘅成果，真係唔講唔知）
------------------------------------------
問： 鍾意SP兩集裡面嘅邊一幕？
答： SP第一集，我最鍾意嘅係Jace幫我洗頭嗰場。因為嗰場我哋係現場係即興咗好多嘢出嚟，個感覺好真實，嗰刻我真係有同佢熱戀中嘅感覺（按：我隔住個mon都感覺到啲愛呀）。同埋出嚟嘅效果都好好，都真係好似一對情侶係到打情罵悄。Jace真係好好，好難得有一個咁好嘅對手，去真係幫大家、相信大家，去交個心俾大家。同埋我同Jace真係好夾，雖然第一次合作拍一集嘢，但過程中同佢嘅默契同火花，真係我從未試過同其他男女演員身上有過嘅（按：係啦係啦）。佢真係我暫時遇過，合作過同我最夾嘅對手、最好嘅演員（按：得喇得喇）。
但我最深刻嘅都係宣傳片嗰場戲： 因為嗰陣無前文後理，好多嘢都係靠自己估同想像。同埋同Jace第一次合作就拍呢場戲，演嘅時候係真係估唔到地好touch到自己個心。嗰陣個感覺真係好心酸，覺得好對唔住佢呢位女朋友。呢場戲嘅感覺仲好記憶猶新，真係要好多謝Jace呢個好好嘅對手。多謝佢帶畀我有活着的感覺。（按：♥）
至於SP第二集，我最鍾意一定係Sofieeeee嘅嗰一大炸獨白。喺現場我真係聽到起晒雞皮，好多好多演員都有被佢打動流淚，Sofieeee真係做得好好。（按：嗰段真係好出色呀 Sofiee Ng 吳海昕）
------------------------------------------
問： 鍾意宣傳片定係SP多啲？點解呢？
答：其實兩條我都好鍾意，但如果真係要揀，我會揀宣傳片。因為分幾鐘嘅短片好完整，有晒起承轉合，好清楚睇到關係、事件、因由好多好多嘅嘢。反而SP，我覺得因為電視時間所限，真係比較急促咗少少。我知道導演、編劇同拍攝團隊已經盡咗力，但始終好多限制，所以都無辦法。如果再多十分鐘去講個故事，可能就會更完美（按：唔錯呀，我鍾意）。
------------------------------------------
問：為挽留另一半做過最癲同最蠢嘅事係咩？
答：為另一半做最蠢的事，係分手嗰陣話要自殺，之後割脈哈哈。但其實中學嗰陣根本淆青（按：係淆青冇寫錯），又無膽，得個講字，點會真係自殺。不過就真係有拎起把界刀嘅，但就無真係割落去，記得好似只係hi到少少，個皮邊滲小小血就唔敢。回想起都覺得自己好好笑。 （按：生命有價，請愛惜自己。唔係我哋冇咗個演員呀 Himmy）
------------------------------------------
問：最近有咩搞作呀？幾時有得再睇你哋嘅演出？
答：啱啱完成咗一套王貽興同劉翁自編自導自演嘅ViuTV劇（按：唔通係傳說中嘅嗰個《VR驅魔人》？）。佢有好多故事嘅，我就係其中一個故仔入面主演一個男朋友角色咁樣。幾時出街就未知，預計都係下年嘅事。嚟緊會先休息一吓，同屋企去下旅行、陪下佢哋。之後十一月會去菲律賓拍攝啦，係一條之前六月去完泰國同糖妹拍攝完後，嗰個航空宣傳片嘅第二集嚟嘅。
（按：有片睇 >> https://www.facebook.com/SkyyerHK/videos/1467562039987752/）
------------------------------------------
#ViuTV #瑪嘉烈與大衛系列前度 #黃定謙 #陳凱詠 #吳海昕 #方以文問兩句
jace舞台劇 在 隔離童話集- 舞台劇 - YouTube 的推薦與評價
隔離童話集尾場︱梁祖堯自爆從柳應廷歌曲得創作靈感陳凱詠謝幕淚崩譚玉瑛客串現身掀高潮（#梁祖堯#Jace #陳凱詠#譚玉瑛#湯駿業#邵美君#趙學而#風車草 ... ... <看更多>