《我知道自己成不了jimmy choo，但做到OT，都開心嘅》
大家有冇發覺每次經過一間OT字頭嘅日本連鎖嘅女裝鞋鋪都人山人海， 呢間鞋舖越開越多。唔知你哋身邊有冇啲朋友， 每次經過呢間鞋鋪，都會入去兜兩個圈，就算冇嘢買，參觀下都好嘅。 呢間鞋舖就好似759 咁，一個月都有幾次特價，你睇中咗邊對，你可以等到佢特價先入貨。
其實間鞋鋪嘅鞋真係唔係靚到喊，咁點解佢會吸引到咁多女人去買同「參觀」呢？
其實呢間鋪頭，就好似uniqlo，佢唔係最靚，但佢嘅性價比真係幾高。佢啲款冇咩咁特別，但呢一個價錢買到呢一啲款而唔刮腳，著到一季真係幾抵，著多過一季真係物超所值。大家都明，好多好貴嘅鞋舖其實都好睇唔好食，只可以買來著，唔可以買來行，每行一步真係步步驚心。要買到一對普普通通，正正常常，舒舒服服，唔太名貴嘅機率，其實同你喺一間公司遇到一個正常會做野唔騎呢嘅同事一樣，真係可遇不可求。
呢間OT字頭嘅鞋鋪，真係好捉到女人嘅心態....
其實我最想我個鞋櫃發展成一個良好嘅ecosystem，即係生物多樣化， 最好每個鞋款都有啲，每個款每個色都有啲，最緊要嘅係，佢要生生不息，呢對爛左玩完左，我下季又可以買返對差唔多或者更好嘅replace。縱使我知道，喺世俗人嘅眼中，你得一對腳，點解個鞋櫃要同 ecosystem嘅種類compare，但如果個鞋櫃可以好似個eco-system咁多樣化，我個心情會好好多。
王迪詩曾經捧紅過jimmy choo，佢話如其買幾十對幾百蚊嘅cheap 鞋，不如買對靚jimmy choo，佢話一對好嘅高踭鞋就好似一個好嘅男人一樣，好嘅，一對就夠。
我覺得呢，大部份嘅女人係想要jimmy choo 成間鋪，女人係想要一個jimmy choo 嘅ecosystem，而唔係只係一對jimmy choo咁簡單。但多數女人都好貼地，個ecosystem 暫時唔可以由名貴鞋sss 組成，就退而求其次，用OT 創造一個ecosystem 先啦。
(又如果jimmy choo 係一個高質男人，係真愛，咁OT 應該係兵.....咁好多已經有jimmy choo 嘅女人，其實都唔會放棄收幾個OT 做兵嘅)
※※※※※※※
其實想話，我好想我嘅作品，好似OT 個間鞋鋪個D 鞋咁，可能唔係最高級嘅，最有文學修養嘅，但係性價比高嘅，受歡迎嘅，多產嘅，大家鐘意嘅。我知道自己成不了jimmy choo，但做到OT，都開心嘅(但絕對唔做劣質淘寶貨)，咁你地買jimmy choo 之餘，都對OT 有興趣嘅..... 努力創造中..... 離(應承左嘅)交稿日愈來愈近真係心情緊張，hahahahaha。
